Shehaj: Rrëzimi i modelit ekonomik të oligarkëve, prioritet kombëtar
Ish-
deputeti i Partisë Demokratike, Agron Shehaj, ka deklaruar se Shqipëria dështoi në samitin e Poznanit në Poloni që të tërheq buxhetime nga BE për investime, ndryshe nga shumë vende të tjera të rajonit. Me anë të një deklarate për mediat nga selia e Partisë Demokratike, Shehaj tha se samiti i Poznanit në Poloni rikonfirmoi edhe njëherë izolimin e plotë ekonomik për Shqipërinë. "Samiti i Poznanit, i vendeve të Ballkanit Perëndimor e rikonfirmoi izolimin ekonomik dhe politik të Shqipërisë. Shqipëria dhe Koreja e Veriut janë të vetmet vende në botë që nuk kanë pasur investime të huaja në këto 6 vite. Ekonomikisht, sot Shqipëria është më e izoluar se kurrë ndonjëherë gjatë 30 viteve të fundit. Sot Shqipëria është vendi më i izoluar nga tregu dhe ekonomia europiane. Praktikisht jemi vendi më i papërgatitur në Evropë për t'u bërë pjesë e tregut të përbashkët europian. Samiti i Poznanit, i vendeve të Ballkanit Perëndimor e rikonfirmoi izolimin ekonomik dhe politik të Shqipërisë dhe paaftësinë e vendit tonë për të qenë pjesë e ekonomisë europiane. Shqipëria nuk mori asgjë nga ky samit, asnjë qindarkë dhe asnjë mbështetje ekonomike. Të gjitha vendet e tjera të Ballkanit morën dhjetëra e qindra miliona euro falas, kurse Shqipëria mori një foto me të cilën mburret kryeministri në "Facebook". Është e njëjta histori që përsëritet në të gjitha takimet e Procesit të Berlinit", - tha ai. Sipas Shehajt, Shqipëria nën qeverisjen e kryeministrit Edi Rama është shndërruar në tregun me të izoluar në Evropë. Mes tjerash, Shehaj shtoi se rrëzimi i skemës së modelit ekonomik të oligarkëve duhet të kthehet në mision kombëtar. "Nga mungesa e mundësive shqiptarët po largohen nga vendi, po ikën veçanërisht rinia, profesionistët, mjekët, inxhinierët. Po ikin zanatçinjtë, teknikët, elektricistët, marangozët. Ky shkretim i Shqipërisë nga njerëzit po e thellon prapambetjen ekonomike dhe varfërinë e vendit. Rrëzim i këtij modeli ekonomik është prioritet kombëtar. Partia Demokratike i fton të gjithë shqiptarët, të protestojmë nesër ( sot) së bashku. Edhe kudër varfërisë. Edhe kundër shkatërrimit ekonomik. Për një Shqipëri të mirëqenies dhe mundësive për të gjithë", - tha ai.