Sulmet ndaj gazetarëve, Berisha: Akte terroriste nga kreu i meduzës
Dëshmia, shkoi të hidhte bombë në banesën e ish- kryeministrit, i shpërtheu në dorë dhe vdiq "Fatos Klosi dha urdhër të më vinin bombë"
Ish- kryeministri Sali Berisha dënoi dje kërcënimet ndaj kreut të KQZ, Klement Zguri dhe studiuesit Aurel Plasari, si dhe sulmet ndaj analistit Fatos Lubonja dhe gazetarit të News 24 Enver Doçi. Berisha denoncoi se të gjitha këto sulme terroriste dhe kërcënime po bëhen nga mafia e narkoshtetit të Edi Ramës. "E them këtë se hakmarrja primitive e skizoidit ka kufij vetëm elektroshokun dhe kjo hakmarrje ka rënë edhe mbi ta për faktin se Plasari, Lubonja dhe Zguri me shkrimet, prononcimet e tyre kanë damkosur keq kreun e meduzës kurse Zguri damkosi farsën moniste antidemokratike, antikushtetuese nga pozitat e kryetarit të KQZ. Ndërsa gazetari Enver Doci u godit sepse po denonconte live aktet e dhunës shtazore të narkopolicve ndaj qytetarëve",- shkruan ish- kryeministri. Referuar sqarimit zyrtar të bërë nga policia për ngjarjen e fundit, atë të sulmit me gurë të makinës se analistit Lubonja, Berisha thekson se kjo është tipike "larje duarsh dhe duke i paraqitur ato si vepër e të sëmurëve psikikë, fakton, gjithashtu, qartë përzgjedhjen e këtyre delinkuenteve nga kupola e mafies shtetërore si dorë e zezë e saj". Berisha denoncoi më tej se sulme të tilla terroriste të bazuara në kodin e mafies janë tipike për diktaturat dhe policitë e tyre sekrete, në rastin e narkoshtetit sipas tij këto sulme i ndërmarrin falangat e mafies të shtetit të drogës. "Prapa këtyre sulmeve terroriste kërcënim me jetën e fëmijëve i Akademikut Aurel Plasari dhe kryetarit Klement Zguri, identike me ato që Mili i Partisë i bëri rektorit Koni, të cilit i tha do të të marr peng djalin, goditjes me gurë të madh të makinës të Lubonjës, për t'i thënë se kështu do të të thyejmë edhe kokën, goditja direkt nga narkobanditët me uniformë e gazetarit në detyrë Enver Doci qëndron kupola e mafies se narkoshtetit e Edvin Kristaq Mafisë, Don Agaçios dhe Sugar Fugës", tha z. Berisha.
DËSHMIA
Ish- kryeministri Sali Berisha sjell në kujtesë një ngjarje që i ka ndodhur vetë atij vite më parë. Berisha hedh dhe një akuzë të fortë ndaj ish- kreut të SHISH, Fatos Klosi, duke thënë se kur drejtonte Shërbimin Inteligjent urdhëroi një person të hidhte bombë në apartamentin e tij. "Po rikujtoj këtu se një person, si këta përzgjodhi vite më parë krimineli dhe agjenti i shërbimeve armike Fatos Klosi për të hedhur bombën tek apartamenti im, por që i shpërtheu në dorë dhe i mori jetën", tha z. Berisha. Ndaj dhe ish- kryeministri shprehu solidaritetin "më të madh ndaj zotërinjve Plasari, Zguri, Lubonja, Doci dhe familjarëve të tyre dhe duke dënuar me ashpërsinë më të madhe këto akte dhunë e terrori të skizoidit Edvin Kristaq Mafisë dhe kupolës përreth tij, le të paralajmërojmë atë dhe narkohorrat që e rrethojnë se do mbahen personalisht përgjegjës për çdo kërcënim dhune e terror ndaj kundërshtarëve politik! Rama Ik! Fitore!". Sali Berisha denoncoi më tej: "Qëndrimi zyrtar ndaj këtyre akteve dhune e terrori shtetëror duke larë duart dhe paraqitur ato si vepër e të sëmurëve psikikë, fakton, gjithashtu, qartë përzgjedhjen e këtyre delinkuenteve nga kupola e mafies shtetërore si dorë e zezë e saj". Ndaj z. Berisha apeloi: "Të ndalim terrorin e falangave të narkoshtetit dhe kreut të tij të meduzës!".