Shpërndante kokainë dhe shfrytëzonte vajza për prostitucion, arrestohet pronari i lokalit

Procedohen në gjendje të lirë edhe 5 femra për prostitucion

ELBASAN - Një 42- vjeçar nga Fieri është arrestuar nga policia e Belshit në bashkëpunim me atë të Elbasanit, ndërsa janë proceduar në gjendje të lirë edhe pesë shtetase të tjera për veprat penale të shfrytëzimit të prostitucionit dhe përdorimit të lëndëve narkotike. Mësohet se personi që përfundoi në pranga është Edmond Çipllaka. "Falë besimit, bashkëpunimit dhe ndërgjegjësimit të komunitetit, u finalizua me sukses operacioni policor i koduar ' Liqeni'. Operacioni nga Sektori për Hetimin e Narkotikëve dhe Trafiqeve të Paligjshme në DVP Elbasan, në bashkëpunim me efektivë të Postës Policore Belsh. Shfrytëzonte për prostitucion vajzat në ambientet e lokalit dhe shpërndante lëndë narkotike, arrestohet në flagrancë nga policia pronari i lokalit, si dhe procedohen penalisht në gjendje të lirë 5 shtetase. Sekuestrohet lëndë narkotike, një automjet dhe celularë", thuhet ndër të tjera në njoftimin e policisë. Sipas këtyre burimeve, specialistët për Hetimin e Narkotikëve dhe Trafiqeve të Paligjshme në Drejtorinë Vendore të Policisë Elbasan, në vijim të punës për parandalimin, evidentimin dhe goditjen e veprimtarisë kriminale të shpërndarjes së lëndëve narkotike dhe shfrytëzimit të lokaleve për prostitucion, bazuar mbi informacionet e marra nga komuniteti se në ambientet e një lokali u shpërndahej lëndë narkotike e dyshuar kokainë klientëve të ndryshëm, si dhe shfrytëzoheshin vajza të moshave të ndryshme për prostitucion, kanë zhvilluar dhe finalizuar operacionin e koduar ' Liqeni', si rezultat i të cilit u arrestua në flagrancë shtetasi: E. Ç., 43 vjeç, banues në Fier, ( pronari i lokalit në të cilin zhvillohej veprimtaria e kundërligjshme). Si dhe u proceduan penalisht në gjendje të lirë 5 shtetase për veprën penale "Prostitucioni". U sekuestruan në cilësinë e provave materiale, 14.7 gr pluhur i dyshuar lëndë narkotike e llojit kokainë, një peshore elektronike, automjeti në pronësi të shtetasit E. Ç., si dhe 6 aparate telefonike celulare. Gjithashtu, ky shtetas nuk ishte i pajisur me kasë fiskale gjatë ushtrimit të aktivitetit në lokal, duke bërë të mundur fshehjen e të ardhurave. Vazhdon puna për identifikimin e personave të tjerë të implikuar në këtë aktivitet kriminal. Materialet hetimore i kaluan Prokurorisë pranë Gjykatës së Shkallës Parë Elbasan, për veprat penale "Prodhimi dhe shitja e narkotikëve", "Shfrytëzimi i prostitucionit", "Mbajtja e lokaleve për prostitucion" dhe "Fshehja e të ardhurave", në ngarkim të shtetasit E. Ç..