Goditet grupi kriminal në Tiranë, vidhnin bizhuteri dhe kasaforta nëpër banesa

Përfundojnë në pranga 3 persona, 1 shpallet në kërkim

TIRANË - Një grup kriminal që vidhnin bizhuteri të shtrenjta, kasaforta, vlera monetare dhe sende të tjera nëpër banesa është zbuluar dhe goditur nga policia e Tiranës. Mësohet se gjatë aksionit efektivët e komisariatit nr. 2 në kryeqytet kanë arritur të sekuestrojnë bizhuteri me vlerë 25 mijë euro. Ndërkohë janë arrestuar në flagrancë 3 persona, 1 është shpallur në kërkim dhe 1 ndiqet në gjendje të lirë. "Shërbimet e komisariatit të policisë nr. 2, më datë 06.07.2019, rreth orës 19: 00, kanë marrë njoftim se në rrugën "Sulejman Pitarka", është vjedhur banesa e shtetasit Th. Q., ku kanë marrë një kasafortë, brenda së cilës kishte disa bizhuteri të shtrenjta dhe një sasi parash. Falë veprimeve hetimore, informacioneve të grumbulluara në rrugë operative për personat e dyshuar, blutë finalizuan operacionin policor ' Kasaforta', duke bërë të mundur zbulimin dhe goditjen e një grupi që ushtronte veprimtari kriminale në fushën e vjedhjes së banesave. Si rezultat u arrestuan në flagrancë shtetasit E. J., 37 vjeç, banues në Tiranë, për veprën penale ' Vjedhja me pasoja të rënda', në bashkëpunim; A. Sh., 22 vjeç, banues në Tiranë, për veprën penale ' Vjedhja me pasoja të rënda', në bashkëpunim si dhe D. P., 33 vjeçe, banuese në Tiranë, për veprën penale ' Veprime që pengojnë zbulimin e së vërtetës'. Si dhe u shpall në kërkim policor dhe po punohet për kapjen e shtetasit K. P., 30 vjeç, banues në Tiranë, për veprat penale ' Vjedhja me pasoja të rënda', në bashkëpunim dhe ' Pastrimi i produkteve të veprës penale ose veprimtarisë kriminale'", njoftoi policia. Gjithashtu, është proceduar në gjendje të lirë edhe shtetasja M. Gj., banuese në Tiranë, për veprat penale "Përvetësimi i parave ose mallrave që rrjedhin nga vepra penale ose veprimtaria kriminale" dhe "Moskallëzim i krimit". Po të njëjtat burime sqaruan se operacioni ka nisur paraditen e datës 07.07.2019 dhe është finalizuar në orët e para të mëngjesit të djeshëm. Policia ka bërë të mundur që në lumin Erzen, në afërsi të Shijakut, të gjejë kasafortën që autorët kishin hedhur në lumë për të humbur gjurmët, si dhe gjatë kontrollit të banesave të tyre, policia gjeti dhe sekuestroi sendet si më poshtë: 41 ora të ndryshme të markave të shtrenjta, katër çelësa specialë për hapje dyersh, një automjet me targa AC 525 T, 11 lima për pastrimin e çelësave special, dy leva për hapje dyersh, një sasi monedhash metalike të llojeve të ndryshme, shtatë telefona celular, një elektrik ( elektroshot), një sasi bizhuterish të ndryshme. Nga veprimet hetimore të kryera rezulton se këta shtetas në bashkëpunim me njëri- tjetrin dyshohen edhe si autorë të vjedhjes së banesës së shtetasit E. Ç., ngjarje e datës 05.04.2019. Materialet iu dërguan Prokurorisë së Rrethit Gjyqësor Tiranë, për veprime të mëtejshme.