Do udhëtonin me viza false për në Kanada, ndalohen dy shtetas turq në aeroportin e Rinasit
TIRANË - Dy shtetas turq janë ndaluar dje nga Policia Kufitare, pasi janë kapur në Rinas me viza false teksa do udhëtonin drejt Kanadasë. Policia e Shtetit deklaroi se Policia Kufitare ka forcuar masat me qëllim parandalimin, evidentimin dhe goditjen e paligjshmërisë, ofrimin e një shërbimi sa më cilësor për qytetarët, si dhe për të parandaluar kalimin e kufirit me qëllim kërkimin e azilit në vendet e BE- së. Gjatë kontrollove, policia ka zbuluar edhe rastin e dy turqve S. S. 39 vjeç dhe H. C. 41 vjeç, që janë arrestuar për veprat penale: "Falsifikim i letërnjoftimeve, i pasaportave ose i vizave", "Falsifikimi i dokumenteve". Ata do të udhëtonin në Kanada. Vizat e tyre janë dyshuar si të falsifikuara nga kontrollorët e Policisë Kufitare dhe janë kaluar në vijën e dytë për ekzaminim në laborator, ku kanë rezultuar viza false.
Gjatë 6 mujorit të parë të këtij viti, nga Policia Kufitare e Rinasit janë proceduar dhe arrestuar 457 shtetas shqiptarë dhe të huaj për vepra të ndryshme penale, konkretisht: "Falsifikimi i dokumenteve", "Kontrabanda" dhe "Mosdeklarimi në kufi i të hollave e sendeve me vlerë", "Kalimi i paligjshëm i kufirit". Gjithashtu, po në vijim të masave për të parandaluar kalimin e kufirit me qëllim azil kërkimin nga Policia Kufitare e Rinasit janë refuzuar në dalje 1.157 shtetas, të cilët nuk plotësonin kushtet për të lëvizur në hapësirën Schengen. Nuk është lejuar hyrja në territorin e R. SH për 60 shtetas me shtetësi të ndryshme. Janë kapur nga Policia Kufitare në Rinas në tentativë për të dalë jashtë vendit apo për të hyrë në Shqipëri me dokumente të falsifikuara 73 persona në kërkim. Gjatë 6 mujorit të parë të këtij viti, nëpërmjet Aeroportit Ndërkombëtar "Nënë Tereza", ka pasur një fluks pasagjerësh prej 1.510.646 udhëtarësh dhe krahasuar me të njëjtën periudhë të vitit 2018, ku ka një rritje të numrit të pasagjereve me 141.559 pasagjerë më shumë. Janë sekuestruar vlera monetare të padeklaruara, në total 276.200 valutë në dollarë, euro etj. Gjithashtu, po gjatë kësaj periudhe janë evidentuar 4 raste të viktimave të mundshme të trafikimit për qëllime të shfrytëzimit të prostitucionit, të cilat i janë kaluar menjëherë për ndjekje Seksionit të Trafiqeve të Paligjshme në DVP Tiranë.