Ekzekutoi efektivin e policisë Ibrahim Basha në Lazarat, ekstradohet pas 4 vitesh autori
Gjatë sulmit ndaj forcave të rendit në vitin 2015 u plagosën edhe 2 policë të tjerë 22- vjeçari Ruhan Hiraj u deportua nga SHBA- të, fshihej atje duke përdorur emrin Sandri Hiraj
Deportohet nga SHBAtë një prej pjesëtarëve të grupit të strukturuar kriminal, ku pas sulmit me armë në qershor të vitit 2015 në Lazarat, mbeti i vrarë punonjësi i policisë, Ibrahim Basha, sot "Dëshmor i Atdheut", si dhe u plagosën dy efektivë të tjerë të policisë. Gjatë paradites së djeshme si rezultat i një operacioni 1- vjeçar, bashkëpunimi i Interpol Tiranës me Zyrën e Hetimeve Kriminale pranë Shërbimit Diplomatik të Sigurisë në Ambasadën e Shteteve të Bashkuara në Tiranë ( DSS), u bë i mundur deportimi nga Shtetet e Bashkuara të Amerikës drejt vendit tonë, për t'u përballur me organet shqiptare të drejtësisë i shtetasit shqiptar Ruhan Hiraj, 22 vjeç, banues në Lazarat, Gjirokastër. Sipas policisë, ky shtetas ishte i shpallur në kërkim ndërkombëtar, pasi Gjykata e Shkallës së Parë për Krimet e Rënda, Tiranë, në vitin 2018 e ka dënuar atë me 15 vjet burg për veprat penale "Kundërshtim i punonjësit të Policisë së Rendit publik me dhunë", "Mbajtja pa leje dhe prodhimi i armëve, armëve shpërthyese dhe i municionit", "Prodhimi i armëve luftarake", "Kryerja e veprave penale nga organizata kriminale dhe grupi i strukturuar kriminal", "Pjesëmarrja në bandën e armatosur".
ARRESTIMI I 22- VJEÇARIT
Ruhan Hirajn fshihej në SHBA duke përdorur emrin Sandri Hiraj. Agjentët e FBIsë pasi e kanë lokalizuar, e prangosën atë në Nju Jork, në 2017- ën. Ai kishte hyrë ilegalisht në SHBA përmes kufirit me Meksikën dhe për më shumë se dy vite iu fsheh autoriteteve. Hiraj u ndalua nga autoritetet amerikane si emigrant ilegal në datën 20 dhjetor 2017. Ruhan Hiraj momentin e arrestimit u deklaroi agjentëve të FBI- së se ai quhej Sandri Hiraj, por nga dërgimi i shenjave të gishtave Interpol Tiranës, u identifikua si një person në kërkim. Pas ndalimit, Interpol Tirana u dërgoi autoriteteve amerikane shenjat e gishtave dhe të dhëna të tjera për identitetin e të ndaluarit. Përgjigjja që dhanë autoritetet amerikane bindën policinë shqiptare se personi që fshihej me identitetin e rremë Sandri Hiraj ishte Ruhan Hiraj, i shpallur në kërkim ndërkombëtar për vrasjen e efektivit të RENEA- s, duke e ekstraduar më pas në Shqipëri.
NGJARJA
Më datë 24.06.2015, në fshatin Lazarat të rrethit Gjirokastër, shtetasi Ruhan Hiraj në bashkëpunim me disa shtetas të tjerë kanë qëlluar me armë zjarri në drejtim të punonjësve të policisë të repartit RENEA, të cilët kanë qenë brenda në automjetin e policisë në vendin e quajtur "Pularia". Si pasojë e këtyre të shtënave, ka mbetur i vrarë brenda në automjetin e policisë, efektivi Ibrahim Basha. Në të njëjtën ngjarje u plagosën dy efektivë të tjerë ( J. I. dhe P. H.) në një furgon ku ndodheshin gjithsej 6 punonjës policie. Ndërkohë, në mars të vitit të kaluar Gjykata e Krimeve të Rënda ka dhënë dy burgime përjetë për dy prej kokave të grupit të zjarrit, Albion Aliko dhe Bajram Boçi. Ndërsa janë dhënë edhe 150 vite burg për 9 të akuzuarit e procesit "Lazarati 2". "Policia e shtetit shqiptar ka një falënderim të veçantë për Zyrën e Hetimeve Kriminale pranë Shërbimit Diplomatik të Sigurisë në Ambasadën e Shteteve të Bashkuara në Tiranë ( DSS), Agjencinë për Emigracionin Doganat dhe Operacionet Speciale ( ICE- ERO), Agjencinë për Patrullimin Kufitar në Shtetet e Bashkuara të Amerikës ( USBP), Byronë Qendrore Kombëtare të Shteteve të Bashkuara të Amerikës, ( USNCN), Interpol Roma dhe Zyrën Uci Albania në Shqipëri e Oficerin e Kontaktit të Policisë së Shtetit në Bari, për koordinimin me Policinë e Kufirit të Roma Fiumicino, për përpjekjet dhe veprimet e tyre për të realizuar gjithë këtë proces të përshpejtuar kthimi në Shqipëri, për t'u përballur me organet e drejtësisë shqiptare".