"Përsëritësi", kryenin kontrata fiktive, përfundojnë në pranga dy persona nga Tirana
TIRANË - Policia e Tiranës ka arrestuar 2 persona, të cilët akuzohen për vepra penale që kanë të bëjnë me fitimin e shumave marramendëse me anë të mashtrimeve. Blutë bëjnë me dije se dy shtetasit e arrestuar gjatë operacionit të koduar "Përsëritësi" akuzohen për vepra penale që kanë të bëjnë me vjedhje të shumave të mëdha, vetëgjyqësi e fshehje të ardhurash. Nga Seksioni për Krimin Ekonomik dhe Financiar në bashkëpunim me Prokurorinë e Rrethit Gjyqësor Tiranë është bërë i mundur finalizimi i operacionit të koduar "Përsëritësi", ku u ndaluan shtetasit M. J., 44 vjeç, banues në Tiranë, i dënuar më parë tri herë për armëmbajtje pa leje dhe kontrabandë me mallra, për të cilët paguhet akcizë dhe F. I., 45 vjeç, banues në Tiranë. Sipas policisë, këta dy persona janë ndaluar, pasi kanë bërë një kontratë fiktive ( shtetasi M. J. i ka shitur shtetasit F. I. me kontratë fiktive 1 milion lekë të vjetra për një pronë, objekt shtypshkronjë me adresë në qytetin e Tiranës, biznes i cili ka një xhiro mujore rreth 100 milionë lekë) duke fshehur të ardhurat, vepër penale kjo, e cila është kryer me qëllim fshehjen apo shmangien nga pagimi i një detyrimi tatimor me vlerë më të lartë se 8 milionë lekë. Ndërsa, shtetasi i dyshuar M. J. ka përvetësuar në mënyrë të kundërligjshme dy automjete, pronë e një banke të nivelit të dytë, për të cilat kolateralin dhe kredinë e paguanin shtetasit N. SH. dhe O. SH.. Gjithashtu, shtetasi i dyshuar M. J. ka përvetësuar në mënyrë të kundërligjshme xhiron mujore të një biznesi të shtetases O. Sh, në vlerën rreth 55 milionë lekë të reja. Materialet procedurale i kaluan Prokurorisë së Rrethit Gjyqësor Tiranë në ngarkim të shtetasve të lartpërmendur, për veprat penale "Vjedhje në shuma të mëdha", "Vetëgjyqësi" në ngarkim të M. J. dhe "Fshehje të ardhurave kryer në bashkëpunim" në ngarkim të shtetasit F. I..