Çako: Synojmë standarde që minimizojnë rrezikun nga fatkeqësitë natyrore

Drejtori i Emergjencave Civile: Masa kundër zjarreve

Drejtori

i Emergjen cave Civile, Haki Çako tha dje se, krijimi i Agjencisë Kombëtare të Emergjencave Civile është institucioni që bën politikat për reduktimin e rrezikut nga fatkeqësitë natyrore dhe do të udhëheqë bashkërendimin e institucioneve të linjës në rastet e emergjencave civile.

Në një intervistë televizive, Çako u shpreh se, "me këtë hap ne synojnë vendosjen e standardeve që minimizojnë rrezikun nga fatkeqësitë natyrore, ndërsa theksoi se janë marrë të gjitha masat për parandalimin e rrezikut të zjarreve tani në sezonin e verës dhe po punohet për parandalimin e përmbytjeve në disa zona që rrezikohen gjatë sezonit të dimrit".

"Një analizë e riskut është bërë dhe vazhdon të bëhet për marrjen e masave, për fenomenet e ndodhura në vitet e shkuara, në fund të 2017 dhe 2016 ku pati përmbytje dhe shira me intensitet të lartë si në Shkodër, Vjosë apo vende të tjera. Janë marrë një sërë masash paraprake. Në vëmendje të kryeministrit është duke u investuar për rehabilitimin e argjinaturës së Vjosës. Ndërsa një investim i rëndësishëm është kryer për mos lejuar më përmbytje në bashkinë e Fierit", - tha ai.

Sipas tij, Ministria e Mbrojtjes në mënyrë të veçantë ka në plan, por edhe vazhdon të kontribuojë në riaftësimin e rrugëve ose urave me qëllim parandalimin e fatkeqësive natyrore.

Çako theksoi se, Shqipëria është një vend me risk të lartë në Ballkan, por edhe në Europë. "Kjo e kushtëzuar, por që buron edhe nga një sërë faktorësh, siç është faktori njeri, në nxitjen e erozionit apo në shkatërrimin e baseneve të lumenjve, ashtu sikurse mund të themi që një efekt të madh ka pasur dëmtimi i pyjeve që sjell një erozion të shpejtë dhe nxjerrjen e lumenjve jashtë kontrollit dhe shkaktimin e përmbytjeve, por edhe ndërtimet pa leje", - tha ai.