Denoncimi, PD: Në Bashkinë e Vaut të Dejës u votua me fletë votimi të falsifikuara
"Edhe kandidate për këshill, edhe mbikëqyrëse e votave"
Partia
Demokratike akuzoi dje KQZ- në se është përfshirë në një proces kriminal për falsifikimin e zgjedhjeve të 30 qershorit. Sekretari i përgjithshëm, Gazmend Bardhi, publikoi disa dokumente duke pretenduar se për Bashkinë e Vaut Dejës është votuar me fletë të falsifikuara. Ai akuzoi se për Bashkinë e Vaut Dejës është votuar me fletë votimi që nuk u dihet origjina. Bazuar në dokumentin e doganave, sekretari i përgjithshëm, Gazmend Bardhi, tha se fletët e votimit kanë qenë në doganë në orën 7: 58 të së dielës së 30 qershorit, ndërsa votimet kishin nisur që në orën 7. "Me angazhimin personal të anëtarëve të KQZ- së është lejuar kryerja e votimit në Bashkinë e Vaut të Dejës me fletë votimi të falsifikuara dhe që nuk i dihet origjina e tyre", theksoi z. Bardhi. Sipas tij, dokumentet faktojnë një proces kriminal të kryer nga KQZ- ja, ndërsa ngriti këtë pyetje. "Me çfarë fletësh votimi nisi procesi në orën 7 të mëngjesit? Sa zgjati procedura e dërgimit të tyre në KQZ, procesi i marrjes në dorëzim të tyre nga KQZ, nisja drejt KZAZ së Bashkisë së Vaut të Dejës dhe procesi i rishpërndarjes në çdo qendër votimi", u shpreh z. Bardhi. Partia Demokratike denoncoi edhe një paligjshmëri tjetër në votimet për Bashkinë e Vaut Dejës. Sipas Bardhit, anëtarët e KZAZ- së ishin në konflikt interesi të hapur. "Prezenca e Lestin Ndojës si një ndër 4 anëtarët e KZAZsë bie ndesh me nenin 32 të Kodit Zgjedhor, që për të shmangur konfliktin e interesit nuk lejon që një anëtar i KZAZ të jetë në marrëdhënie pune me ndonjë prej kandidatëve. Por akoma më shumë, zonja Lestin Ndoji ka qenë kandidate për Këshillin Bashkiak të Bashkisë në Vaun e Dejës", u shpreh sekretari i PD- së.