Meta, "Luani i Artë" për promovimin e demokracisë dhe pluralizmit politik
Presidenti
i Republikës, Ilir Meta, u vlerësua dje në Venecia me çmimin ndërkombëtar "Luani i Artë", me motivacionin "Në vlerësim të kontributeve të tij për promovimin e demokracisë dhe pluralizmit politik, për forcimin e paqes dhe stabilitetit në Ballkan, për promovimin e bashkëjetesës dhe harmonisë fetare, si edhe për forcimin marrëdhënieve italo- shqiptare". Në prani të autoriteteve vendore të rajonit të Venetos, që i akorduan këtë çmim, Presidenti Meta tha se çmimi është një simbol i miqësisë Itali- Shqipëri, një miqësi unike dhe e pandashme. "Ky është një çmim që në radhë të parë i dedikohet popullit shqiptar. Veçanërisht shqiptarëve të Italisë, që nga ata të ardhur prej shekujsh në Itali e deri te shqiptarët e ditëve të sotme; për punëtorët, studentët e për të gjitha familjet e shqiptarëve. Ky është një çmim që u shkon edhe mijëra italianëve që jetojnë e punojnë në Shqipëri prej vitesh, sipërmarrës, studentë, profesionistë. Ky çmim është një simbol i miqësisë Itali- Shqipëri, një miqësi unike dhe e pandashme", tha z. Meta. Ai përmendi se: "Unë kam lindur 50 vite më parë në diktaturën më të errët që Europa ka njohur. Falë demokracisë, unë, një student i ri, u bëra deputet, ministër, kryeministër, kryetar Kuvendi e President i Republikës, ndaj ky çmim i dedikohet demokracisë, si sistemi i vetëm që mund të ndryshojë të ardhmen për të rinjtë dhe qytetarët e një vendi. Ky është një çmim, që u dedikohet gjithashtu udhëheqësve të moderuar të rajonit, të cilët falë pjekurisë, dialogut, kanë bërë që vendet e Ballkanit, që sillnin vetëm krizë e luftë, sot janë më afër Europës e më afër paqes mes popujve".