Majko- Mediu, në krah të MEK: Mbështesim lirinë e Iranit
Politikanë nga SHBA dhe vende të tjera vizitojnë "Ashraf 3" Rudy Giuliani: Ndal regjimit të terrorit!
Politikanë shqiptarë të majtë e të djathtë si dhe personalitete nga SHBA- të dhe vende të tjera u mblodhën dje në kampin e Manzës, në përkrahje të muxhahedinëve iranianë. Gjatë fjalimit të mbajtur në tubim, Pandeli Majko, ministri shqiptar i Diasporës, tha: "Politikanët në Shqipëri kanë pasur debate të forta, por nuk kanë asnjë debat për sa i përket qëndrimit tuaj këtu, sepse ju jeni në fatin e shqiptarëve dhe kjo është kultura jonë". Majko i bëri thirrje regjimit iranian dhe tha: "Nëse duan t'ju prekin, ata duhet ta dinë se nëse ngrihet çështja, ambasadori i Iranit dhe zëvendësi do të dëbohen".
Fatmir Mediu, kryetar i Partisë Republikane, tha: "Dua t'i falënderoj MEK- ët që i kanë sjellë gjithë këta miq në Shqipëri. Ndryshimi në Iran ka shumë kohë që nevojitet… Plani me 10 pika i Madamë Rajavi- t është për demokraci dhe liri për Iranin. Ju mbështesim të gjithë bashkë për lirinë e Iranit".
KONFERENCA
Për herë të parë, qindra personalitete nga të dyja krahët e politikës dhe nga të dyja anët e Atlantikut si dhe nga Lindja e Mesme qenë të pranishëm mes mijëra anëtarëve të MEK, të cilët u zhvendosën në Shqipëri nga Iraku në vitin 2016. Mes folësve në këtë event ishin avokati personal i Presidentit amerikan Donald Trump, Rudy Giuliani; senatori Joseph Lieberman, ish- sekretari i Sigurisë Kombëtare Tom Ridge etj. Folësja kryesore në këtë event ishte presidentja e zgjedhur e Këshillit Kombëtar të Rezistencës së Iranit ( NCRI), Maryam Rajavi. Rajavi tha se fashizmi fetar që sundon Iranin ka arritur fundin dhe po i afrohet përmbysjes. Regjimi nuk e ka aftësinë për të negociuar, për ta braktisur terrorizmin dhe ndërhyrjet e tij në rajon, apo për të manovruar politikisht, siç bënte gjatë periudhës së paqësimit. Ajo shtoi se, ndërkombëtarisht regjimi po "i var shpresat tek mosveprimi dhe toleranca nga ana e komunitetit ndërkombëtar. Llogaritjet e mullahëve janë se operacionet terroriste dhe nxitja e konflikteve në vendet e rajonit nuk do t'u kushtojnë shumë, të paktën deri në zgjedhjet presidenciale të radhës në SHBA". "Zgjidhja e pamohueshme është përmbysja e diktaturës fetare në tërësinë e saj nga populli i Iranit dhe rezistenca e tij", shtoi znj. Rajavi. Kryebashkiaku Giuliani i quajti muxhahedinët iranianë si luftëtarë të lirisë dhe tha: "Kur të shkruhet historia, do të thuhet se ju jeni luftëtarët e lirisë, që do ta udhëhiqni popullin tuaj drejt lirisë. Ta bëjmë të qartë: ekziston një alternativë ndaj këtij regjimi të tmerrshëm terrori. Këshilli Kombëtar i Rezistencës së Iranit, i udhëhequr nga presidentja e zgjedhur, Madamë Rajavi; një koalicion organizatash rezistence, i respektuar në mbarë botën", shtoi Giuliani. Senatori Lieberman i vlerësoi muxhahedinët për ndërtimin e ' Ashraf 3' në një kohë kaq të shkurtër dhe tha: "' Ashraf 3' është dëshmia më e mirë e faktit që ju jeni alternativa ndaj këtij regjimi". "Nuk është vetëm fakti që ju përfaqësoni një alternativë ndaj ajatollahëve në Iran sot. Ju përfaqësoni alternativën e duhur dhe ajo nis si çdo lëvizje. Një lëvizje ka nevojë për një udhëheqës të fortë, me parime dhe bashkëpunues, dhe pikërisht këtë e keni, falë Zotit, te znj. Maryam Rajavi", shtoi Lieberman.