Rikthehet kanabisi në Lazarat, përfundojnë në pranga 5 persona, mes tyre 2 gra
Policia: Kishin kultivuar drogë në oborr
GJIROKASTËR - Pesë vite, pasi Policia e Shtetit ndërhyrë për herë të parë në fshatin e Lazaratit të Gjirokastrës, disa banorë i janë rikthyer sërish traditës së vjetër. Mësohet se policia e Gjirokastrës ka vënë në pranga pesë persona, të akuzuar për kultivim kanabisi. Katër prej të arrestuarve janë nga Lazarati, ndërsa një tjetër nga Saranda. Sipas policisë, gjatë kontrollit në banesat e tyre janë gjetur të mbjella 10- 15 bimë kanabisi. "Vijon puna për kontrollin e territorit, me qëllim parandalimin, evidentimin dhe goditjen e kultivimit të bimëve narkotike. Gjatë operacionit të koduar "Sopoti" janë arrestuar në flagrancë 5 shtetas nga Lazarati. Gjatë kontrollit në oborret e banesave te tyre u konstatuan të mbjella nga 10 deri 15 bimë të dyshuara narkotike", thuhet ndër të tjera në njoftimin zyrtar të policisë. Ndërsa, sqaron se "në vijim të punës për parandalimin, evidentimin dhe goditjen e veprimtarisë kriminale në fushën e narkotikëve, në vijim të kontrollit të pandërprerë të territorit, gjithashtu, mbi bazën e informacioneve të siguruara në rrugë operative, në oborret e 5 banesave u konstatuan të kultivuara bimë të dyshuara narkotike, shërbimet e Policisë ushtruan kontroll.
Si rezultat i operacionit u arrestuan në flagrancë shtetasit: B. A., 65 vjeç, banues në fshatin Lazarat; S. A., 40 vjeç, banues në Sarandë; M. K., 69 vjeç, banues në fshatin Lazarat; H. N., 46 vjeçe, banuese në fshatin Lazarat; B. N., 36 vjeçe, banuese në fshatin Lazarat. Materialet në ngarkim të tyre i kaluan Prokurorisë Pranë Gjykatës së Shkallës së Parë Gjirokastër për veprën penale "Kultivim i bimëve narkotike", parashikuar nga neni 284 i Kodit Penal".