Sulmi ndaj policisë në Elbasan, ja provat që "rrëzojnë" Suel Çelën dhe Enea Bekteshin
Avokatët në gjykatë: Nuk ishte përplasje, por fërkim i dy makinave Shenjat e gishtave tek "Audi" dhe një cigare puro "tradhtojnë" të akuzuarit
Gjykata për Krime të Rënda dëgjoi provat shkresore të Prokurorisë, për ngjarjen e Elbasanit, ku u përplas makina e Policisë përballë tregut agro- ushqimor. Duke iu referuar relatimit të prokurorit, duket se dy provat më të forta të Krimeve të Rënda për identifikimin e autorëve, janë shenjat e gishtave të gjetura në krahun e pasagjerit në "Audin" e zi dhe një cigare puro, ku janë përfituar materiale biologjike që korrespondonin përkatësisht shenjat e gishtave të Enea Bekteshit dhe në cigaren puro është përfituar material biologjik i përputhshëm me atë të Suel Celës. Gjatë seancës së djeshme, gjykata pa edhe videon, ku dukej momenti i përplasjes se "Audit" me makinën e drejtorit të Policisë së Elbasanit në atë kohë, Gjergji Oshafi. Duke komentuar videon, avokatët e të pandehurve pretenduan se qëllimi i drejtuesit të "Audit", nuk ishte policia dhe se nuk ka pas një përplasje, por fërkim të dy makinave, në kushtet kur makina e policisë ikën indietro. Ndërkohë, prokurori i çështjes, lexoi një sërë provash të tjera, ndërsa seanca u shty për të parë dy video të tjera.
Suel Çela akuzohet nga prokuroria si personi, i cili me makinën e tij tip "Audi" goditi në shtator të vitit 2017 në hyrje të tregut agro- ushqimor, makinën e policisë, duke
vënë në rrezik jetën e zëvendësdrejtorit të qarkut Gjergj Oshafi dhe disa oficerëve të tjerë. Çela konsiderohet nga policia si një person me rrezikshmëri të lartë. Ai ka edhe emra të tjerë si Marjus Petrit Lulaj. Sipas Prokurorisë së Krimeve të Rënda mjetin "Audi" që goditi policinë e ka drejtuar Suel Çela. Nën akuzë për këtë ngjarje, janë vënë edhe dy miqtë e tij, Enea Bekteshi dhe Kelmend Xhaferri. Incidenti, nga i cili u publikuan dhe video atë kohë shkaktoi një reagim të madh në radhët e strukturave të Policisë së Shtetit dhe lëvizje dhe tërhoqi vëmendjen duke u bërë lajmi kryesor në mediat shqiptare.
PROVAT
Duke iu referuar relatimit të prokurorit, duket se dy provat më të forta të Krimeve të Rënda për identifikimin e autorëve janë shenjat e gishtave të gjetura në krahun e pasagjerit në “Audi”- n e zi dhe një cigare puro, ku janë përfituar materiale biologjike që korrespondonin përkatësisht shenjat e gishtave të Enea Bekteshit dhe në cigaren puro është përfituar material biologjik i përputhshëm me atë të Suel Çelës.