Të rinjtë dhunuan bustin e Françesk Radit, reagon e bija: S'kanë dëgjuar kurrë muzikë, janë incidente të universit
Rozana Radi: Nuk di në cilën fytyrë t'ju pështyj Deda: Ndyrësira, vetëm riedukimi ju bën derman
Ditën e hënë është përhapur një video ku dy adoleshentë përdhosën bustin e artistit të ndjerë, Françesk Radi. Menjëherë pas këtij veprimi të pahijshëm artistë të shumtë reaguan në lidhje me ngjarjen. Ndërkaq vetë e bija e artistit të ndjerë, Andeta Radi ka dhënë në një prononcim për "Gazeta Shqiptare" lidhur me këtë akt të shëmtuar. "Asnjë difekt fizik nuk e bën njeriun të duket kaq i shëmtuar dhe i neveritshëm sa injoranca. Jam e bindur se asnjëri prej tyre nuk ka dëgjuar muzikë në jetën e tij, se muzika i bën njerëzit më të mirë. Këta nuk mund t'i quash qenie njerëzore, këta janë thjesht incidente të universit",- është shprehur Andeta. Një ngjarje e tillë nuk mund të anashkalohej dhe nga mbesa e Françeskut, Rozana Radi. Përmes një postimi të gjatë në rrjetet sociale, ajo bën thirrje që të merren masa të rrepta ndaj dy djemve dhe t'i venë para përgjegjësisë. "Është bërë virale një video, ku dy adoleshente dhunojnë bustin e kantautorit Françesk Radi. Përveç lidhjes familjare, sot dua të flas si qytetare e këtij vendi në të cilin dua të rris nesër fëmijët e mi. Dua të
flas si një dashamirëse e muzikës. E kam parë që në orët e para te paradites këtë video dhe ende jam në pritje që "Policia do t'i identifikoje autorët " të cilët do të vihen përpara përgjegjësisë! Keqardhje e madhe për këtë brez që po rritet në Shqipëri. Do isha shumë kurioze t'i njihja nga afër këta dy adoleshente e ti pyesja se çfarë ju bëri busti i një artisti, i cili i dha aq shumë muzikë Shqipërisë. Në moshën tuaj Franko pas shkollë merrte këtë kitarë që ju po përpiqeni t'ia hiqni nga duart dhe këndonte. E internuan, e larguan nga nëna nga babai nga motrat nga vëllezërit, por kitarën nuk ja hoqën dot. Nuk di në cilën fytyre t'ju pështy e t'ju tregoj gjithë zemërimin tim të vajzës të djalit të bashkëshortes, por më shumë të spektatorit që Franko i dha gjithë rininë. A i keni bërë pyetjen vetes nëse i keni lumturuar me këtë xhest familjarët tuaj? A janë krenarë për atë që ata përfaqësojnë. Në Shqipërinë tonë vërtet mungojnë shumë gjëra, por një gjë e kemi të sigurtë ( më mirë një seks i sigurtë se një fëmijë i tillë ). I lutem autoriteteve të ndjekin rastin dhe t'i venë para përgjegjësisë të dy këta palaço të cilët na e bëjnë pis artin kulturën dhe rininë shqiptare! Sot është dhunuar një vlerë publike. Nesër një tjetër e një tjetër…… Ju lutem, të gjithëve ta marrin këtë foto të turpshme e ta postojnë me hashtagun # mambroartistin",- shkruan Rozana Radi në rrjete sociale.
Ndërkaq një sjellje e tillë nuk ka lënë pas as reagimin e këngëtarit Elton Deda, i cili i quan të rinjtë ndyrësira, të cilëve vetëm riedukimi ju bën derman. Deda shkruan se të rinjtë si këta në video e bënë që ta marrë malli për kohën e qoftëlargut. "Ndyrësira! Duhet pasaportizim për Tironë! Vetëm riedukimi ju bën derman. Ndyrësira si ju na bën të na marrë malli për kohën e qoftëlargut!" shkruan Deda, në ' Facebook'.