Ursula, kush është presidentja e re e Komisionit Europian
“Deutsche Welle”
( vijon nga faqja 1)
... Kësisoj, ajo do të jetë gruaja e parë në krye të këtij posti të lartë të BE- së.
Ajo mori 383 nga 747 vota të mundshme, vetëm nëntë më shumë se minimumi për zgjedhjen e saj. 327 ligjvënës votuan kundër saj dhe 22 abstenuan.
Pasi u komunikua votimi përfundimtar, ajo tha se qëllimi i saj është një Evropë e fortë dhe e bashkuar.
Me një fjalim pasionant para Parlamentit Europian dhe me një fushatë intensive gjatë ditëve të fundit, ajo ka shpalosur konceptin e saj për BE- në.
PËR NJË BE TË FORTË
Me premtime e reja për temat si mbrojtja e klimës dhe të drejtat parlamentare, Ursula von der Leyen kërkoi mbështetje për zgjedhjen si presidente e Komisionit të BEsë. Në një shkresë prej tetë faqesh ajo u ishte drejtuar edhe socialdemokratëve europianë duke deklaruar ndër të tjera se do të ndërmarrë një nismë të re për pakësimin e emetimeve të gazrave të efektit serë. Deri në vitin 2021 ajo do të paraqesë një plan për bisedimet mbi klimën, se si "në mënyrë të përgjegjshme" të arrihet pakësimi me 55 për qind i këtyre gazrave në atmosferë. Deri më 2050, BE- ja duhet të bëhet neutrale ndaj klimës.
Duke iu referuar kërkesave të social- demokratëve, politikania e CDU- së premton se dëshiron të arrijë vendosjen e kritereve ligjore për pagën minimale në mbarë BEnë dhe të avancojë luftën kundër papunësisë te të rinjtë. Programi i shkëmbimeve ' Erasmus' duhet të zgjerohet edhe për ata që ndjekin shkollat profesionale. Lidhur me politikën e refugjatëve, ajo shpreson te një mekanizëm i ri për ndarjen e barrës mes vendeve anëtare.
"E DREJTA PËR NISMA LIGJORE", PËR PARLAMENTIN E BE
Ndryshe nga deri më sot, Von der Leyen synon edhe një rol më të fuqishëm të Parlamentit të BEsë në procesin legjislativ të BE- së, sepse deri tani vetëm Komisioni i BE- së ka pasur të drejtë të ndërmarrë nisma ligjore.
Sfidat me të cilat konfrontohet Europa, sipas Von der Leyen, mund të përballohen vetëm me vendosmëri dhe duke mbrojtur vlerat e përbashkëta, por edhe duke u angazhuar për një shoqëri më korrekte, më tolerante dhe më me barazi.
Von der Leyen pas emërimit nga kryetarët e shteteve dhe të qeverive këtë të martë ( 16.07) kaloi me sukses, ndonëse me shumicë të vogël, votimin në Parlamentin Europian.
Von der Leyen komunikoi një ditë më parë ( 15.07) në "Twitter", se do të tërhiqet nga posti i ministres së Mbrojtjes edhe pa qenë i qartë rezultati i votimit të së martës, me qëllim që t'i kushtohet më fort punës së saj në Europë. Deri në votimin përfundimtar ajo pati një betejë të ashpër në Parlamentin Europian, pasi e paraqitur si kandidate kompromisi, ajo nuk gjente përkrahje sa duhet, kryesisht nga grupi i partive socialdemokrate europiane. Të gjelbrit dhe të majtët patën deklaruar javën e kaluar se nuk duan ta votojnë ministren gjermane të Mbrojtjes.
Von der Leyen do të nisë detyrën si pasuese e Jean- Claude Juncker në krye të komisionit më 1 nëntor. Ajo është gjermania e parë që do të drejtojë ekzekutivin e BE- së që nga modernizimi i Bashkimit Evropian. Diplomati gjerman, Walter Hallstein ka qenë kryetar i Komisionit të mëparshëm të Bashkësisë Ekonomike Evropiane nga viti 1958 deri më 1967.