Hyn në fuqi ligji: Biznese, keni 90 ditë kohë për hapur llogari bankare
Tatimpaguesit e regjistruar rishtas duhet të hapin llogarinë jo më vonë se 20 ditë Masat administrative për bizneset që nuk zbatojnë ligjin, ose do keni sanksione
Hyn në fuqi ligji që detyron të gjitha bi zneset, edhe ato të vogla, që të hapin llogari bankare, që është pjesë e një pakete masash për të luftuar fenomenin e pastrimit të parasë në Shqipëri. Tatimet kanë njoftuar se tatimpaguesit e regjistruar pranë Qendrës Kombëtare të Biznesit/ Administratës Tatimore janë të detyruar të hapin llogarinë bankare të biznesit të tyre, jo më vonë se 90 ( nëntëdhjetë) ditë nga hyrja në fuqi e këtij ligji ( data 26.07.2019) dhe ta deklarojnë atë në administratën tatimore. Ndërsa tatimpaguesit e regjistruar rishtas, janë të detyruar të hapin llogarinë bankare të biznesit/ organizatës, jo më vonë se 20 ( njëzet) ditë kalendarike nga e nesërmja e regjistrimit në Qendrën Kombëtare të Biznesit/ Administratën Tatimore dhe ta deklarojnë atë në Administratën Tatimore. Me anë të ligjit nr. 31/ 2019 "Për disa shtesa në ligjin nr. 9920, datë 19.05.2008 "Për procedurat tatimore në Republikën e Shqipërisë", të ndryshuar, është përcaktuar se, tatimpaguesit persona fizikë tregtarë, të regjistruar për tatimin mbi vlerën e shtuar, tatimpaguesit persona juridikë, pavarësisht nga qarkullimi që realizojnë, si
dhe organizatat jofitimprurëse të regjistruara në organin tatimor, janë të detyruar të kenë llogari bankare të biznesit/ organizatës së regjistruar dhe ta deklarojnë atë në administratën tatimore.
MOSPËRMBUSHJA E DETYRIMIT
Në rast të mospërmbushjes së detyrimit tatimor të sipërcituar, ligji parashikon sanksione për tatimpaguesit. Administrata Tatimore nxit tatimpaguesit subjekte të këtyre përcaktimeve ligjore, të përmbushin në mënyrë vullnetare këtë detyrim ligjor brenda afateve.
SANKSIONET
Ligji parashikon që biznesi dhe OJF- të janë të detyruara të hapin llogari bankare dhe nëse kjo nuk ndodh, ato do të penalizohen. Për secilën kategori, masa e gjobave është e ndryshme. Kështu tatimpaguesit persona fizikë tregtarë, të regjistruar për Tatimin mbi Vlerën e Shtuar, me qarkullim deri në 8 milionë lekë, gjobë në masën 50 mijë lekë. Tatimpaguesit persona juridikë, pavarësisht nga qarkullimi, si dhe tatimpaguesit persona fizikë tregtarë, me qarkullim mbi 8 milionë lekë, gjobë në masën 100 mijë lekë dhe së treti organizatat jofitimprurëse, gjobë në masën 75 mijë lekë. Në rast se subjekti nuk ka llogari bankare për transaksionet që kryen edhe pas dënimit si më sipër, dënohet me dyfishin e gjobës së parë.