Ministria e Financave: Borxhi, sa 63% e PBB- së në mesin e vitit
Borxhi publik i Shqipërisë, rreth 1.1 trilionë lekë, ose rreth 9 miliardë euro Në 6- mujorin e parë, qeveria shqiptare rriti lehtë borxhin e brendshëm
Ministria e Finan cave e vlerëson borxhin publik i Shqipërisë sa 63% e Prodhimit të Brendshëm Bruto. Shifrat zyrtare të borxhit publik në fund të muajit qershor tregojnë një rënie të përkohshme të borxhit publik në terma realë, por kjo është një shifër e destinuar të rritet më tej gjatë vitit, me zgjerimin e pritshëm të stokut të borxhit. Mbështetur në projeksionet e buxhetit 2019, borxhi publik pritet të jetë rreth 64.9% në fund të këtij viti. Sipas të dhënave nga Ministria e Financave, në 30 qershor borxhi publik i Shqipërisë ishte rreth 1.1 trilionë lekë ose rreth 9 miliardë euro. Që nga fillimi i vitit, borxhi është ulur me rreth dy miliardë lekë. Deficiti i ulët, madje edhe suficiti për muaj me radhë është bërë një tendencë pak a shumë tipike për buxhetin e shtetit në pjesën e parë të vitit. Kjo ndodh sepse në këtë periudhë, ecuria e shpenzimeve publike dhe sidomos e investimeve është e ngadaltë. Zakonisht, pjesa më e madhe e deficitit shpenzohet në pjesën e dytë të vitit dhe sidomos në tremujorin e fundit. Kjo reflektohet më tej edhe në ecurinë e treguesve të borxhit. Banka e Shqipërisë i ka sugjeruar në mënyrë të përsëritur qeverisë shqiptare një shpërndarje më të barabartë të shpenzimeve buxhetore gjatë vitit.
6- MUJORI
Në 6- mujorin e parë, qeveria shqiptare ka rritur lehtë borxhin e brendshëm, ndërsa ka ulur me afro shtatë miliardë lekë borxhin e jashtëm. Ndërkohë, edhe këtë vit vazhdon zgjatja e maturimit të borxhit të brendshëm. 64% e huamarrjes së brendshme është financuar përmes obligacioneve, ndërsa maturimi mesatar i titujve të huamarrjes ka arritur në 824 ditë. Kjo është strategji që po ndiqet me qëllim uljen e rrezikut të rifinancimit dhe shfrytëzimin e normave të ulëta të interesit që ofron tregu sot.
PROJEKSIONI 2016- 2020
Të dhënat ekonomike dhe financiare tregojnë një përshpejtim të rritjes ekonomike dhe përmirësim të balancave kryesore makroekonomike gjatë vitit 2016 dhe gjashtëmujorit të parë të vitit 2017. Ekonomia në vend vijoi të zgjerohet, e mbështetur kryesisht nga rritja e investimeve dhe nga përmirësimi i aktivitetit në sektorin e shërbimeve. Bazuar në vlerësimet e Produktit të Brendshëm Bruto nga INSTAT, rritja reale për të gjithë vitin 2016 rezultoi në 3.5% dhe 3.9% në tremujorin e parë të vitit 2017. Inflacioni mesatar për gjashtëmujorin e parë të vitit 2017 shënoi vlerën 2.2%, duke qëndruar nën nivelin e targetuar të Bankës së Shqipërisë ( prej 3%). Kushtet monetare stimuluese kanë favorizuar rritjen e kreditimit dhe uljen e kostos së shërbimit të borxhit. Në këtë mënyrë, ato kanë nxitur konsumin dhe investimet private, si dhe kanë krijuar parakushtet e nevojshme për kthimin e inflacionit në objektiv. Këto të dhëna sinjalizojnë se aktiviteti ekonomik në vend po ndjek një trajektore pozitive zhvillimi, ndërkohë që analizat dhe parashikimet për periudhën afatmesme sugjerojnë se ekonomia shqiptare do të vazhdojë të rritet deri në 4.4% në fund të vitit 2020.