Vokshi: Rama po grabit Kopshtin Botanik për ta bërë kulla
Partia
Demokratike ka denoncuar dje si një tenta tivë për të grabitur hapësirën e Kopshtit Botanik botës universitare në funksion të bërjes së pallateve. Ish- deputetja e Partisë Demokratike Albana Vokshi e shoqëruar edhe nga një grup studentësh të shkencave të natyrës, ka akuzuar direkt kryeministrin
Edi Rama se po u merr pronën studentëve për t'ia dhënë Bashkisë së Tiranës për ta bërë pallate. "Nën pretekstin e modernizimit Edi Rama ka vendosur që edhe një hapësirë kaq të rëndësishme, unikale, për sa i përket arsimit të lartë, për sa i përket mësimdhënies, për sa i përket shkencës shqiptare, ta marrë atë nga Universiteti i Tiranës, për t'ia dhënë shumë shpejt privatëve me qëllim për ta shndërruar në kulla betoni. Është shumë e qartë se me këtë kalim pronësie, Edi Rama ka vendosur që të betonizojë edhe një prej parqeve të vetme në Tiranë. Edi Rama i ka rrëmbyer Tiranës çdo hapësirë sportive, i ka rrëmbyer çdo park të gjelbër, tani e ka radhën e Kopshti Botanik", - tha Vokshi. Më tej ajo shtoi se vendimi nuk ka marrë pëlqimin e dekanatit dhe të studentëve, çka tregon se ai është kundër interesit të universitetit dhe mësimdhënies. "Ky është një vendim i Këshillit të Ministrave, i cili është kundërshtuar me forcë nga dekanati, është kundërshtuar me forcë nga Këshilli Studentor, anëtarët e të cilit janë këtu me mua sot, është kundërshtuar me forcë edhe nga sindikata e punonjësve të universiteteve. Arsyeja e kundërshtimit është se vendimi është marrë pa u konsultuar më parë me përfaqësuesit e Shkencave të Natyrës, pa miratimin e dekanit, pedagogëve dhe studentëve, që e përdorin Kopshtin Botanik si një mjedis unik për kërkimet e tyre shkencore", - tha Vokshi.