Protesta e opozitës, kryetari i ri i Devollit "ngujohet" në zyrë
Forca të shumta policie morën në mbrojtje Duron që mbërriti në zyrë që në orën 06: 30 Basha: Regjimi kriminal po hyn në rrugën e përplasjes me popullin
Procesi i konstituimit të këshillave dhe betimit të kryetarëve të rinj të bashkive është shoqëruar dje me përplasje mes përfaqësuesve të opozitës dhe forcave të rendit. Situata më e vështirë ka qenë në Bashkinë e Devollit, ku kryetari në ikje Bledion Nallbati dhe përkrahës të shumtë të opozitës kanë rrethuar godinën e bashkisë duke protestuar për zaptimin e saj nga kryetari i ri, Eduard Duro që vjen nga radhët e Partisë Socialiste. Duket se kryebashkiaku i ri ka pasur informacione në lidhje protestën e opozitës dhe siç mësohet ka shkuar në zyrën e tij në Bashkinë e Devollit që në mëngjes herrët, në mënyrë që të shmangte përplasjen fizike me protestuesit. Ndërkohë që menjëherë pasi ai ka hyrë në zyrë forca të shumta të policisë vendore dhe FNSHsë kanë zënë vend në hapësirën përpara Bashkisë së Devollit duke mos lejuar protestuesit që të depërtonin në të. Gazetarët nga vendngjarja raportuan se një numër i madh policësh kanë qëndruar edhe në ambientet e brendshme të Bashkisë së Devollit, çka ka bërë që situata t'i ngjajë një shtetrrethimi. Vetë kryebashkiaku Duro ka bërë të ditur për mediat se forcat e rendit ishin thirrur prej tij për shkak të informacionit paraprak që ai kishte lidhur me protestën e opozitës. "Një pjesë e punonjësve kanë hyrë në zyrë. Policinë e kam thirrur unë pasi kisha informacion se do bëhej ky tubim. Po pres që të gjithë punonjësit e tjerë të hyjnë në zyrë. Ish kryetari nuk pranoi të largohej ndaj u detyruam të veprojmë kështu. Unë kam patur takime edhe me punonjësit ditën e shtunë, - tha Duro duke folur për mediat lidhur me këtë situatë. Nga ana tjetër ish- kryetari Nallbati deklaroi se kryetar është vetëm ai dhe se do të jetë çdo ditë, 24 orë për qytetarët e Devollit. Simpatizantët e PD kanë qëndruar për orë të tëra në shoqërinë e Bledion Nallbatit dhe ish- deputetit Ervin Salianji, i cili deklaroi para mediave se personi i vetëshpallur si kryebashkiak madje që zaptoi edhe zyrat, do të kallëzohet edhe për përvetësim të titullit. "Qytetarët kanë dalë për të mbështetur kryetarin e ligjshëm të Devollit. Siç e keni parë nuk po lejojnë in
stalimin e një junte debilash, të cilët flenë nëpër institucione duke i trajtuar si fjetore ku prodhojnë para. Personi i vetëshpallur si kryebashkiak dhe që zaptoi zyrat do të kallëzohet edhe për përvetësim të titullit. Qytetarët janë në mbështetje të kryetarit Nallbati, i cili është i ligjshëm", - tha Salianji. Protestuesit vendosën para bashkisë edhe një dyshek në shenjë simbolike, për të treguar se kryetari aktual Eduard Duro e ka kthyer bashkinë në fjetore. Ndaj situatës së krijuar në Devoll reagoi dje edhe kryetari i Partisë Demokratike, Lulzim Basha i cili tha se pushteti i paligjshëm që përfaqëson vetëm 6% të qytetarë po uzurpon me dhunë qeverisjen lokale kundër vullnetit të popullit. "Pushteti i paligjshëm i 6% po uzurpon me dhunë qeverisjen lokale, kundër vullnetit të popullit. Ky regjim kriminal dhe plaçkitës po hyn në rrugën e verbër të përplasjes me popullin e tij. Sot hajdutët në pushtet ndjehen të mbrojtur se kanë polici speciale, gaz lotsjellës dhe mercenarë, por nesër do të kenë fatin që meritojnë hajdutët dhe banditët!", - shkroi Basha.