Vendimi i qeverisë: Si do të përllogaritet masa e qirasë për banesat sociale
Këshilli i Ministrave jep shembullin e saktë të llogaritjes për një apartament "Pagesa vjetore, jo më e madhe se 3% e kostos së ndërtimit apo blerjes"
Masa e qirasë për banesat sociale, që sigurohen me financime të sektorit privat do të përcaktohet nga subjektet që e kanë financuar, në bashkëpunim me njësinë e vetëqeverisjes vendore. Vendimi i propozuar nga ministri i Financave dhe Ekonomisë ka hyrë në fuqi ditën e djeshme, pas botimit në Fletoren Zyrtare. "Gazeta Shqiptare" zbardh sot vendimin e qeverisë nr. 522 të datës 25.07.2019 "Për metodikën e llogaritjes së masës së qirasë për banesat sociale me qira".
PËRLLOGARITJA
Në vendim bëhet me dije se mënyra e llogaritjes së masës së qirasë për banesat sociale, e përcaktuar me këtë vendim u referohet banesave sociale me qira, që sigurohen nëpërmjet ndërtimit të banesave të reja; banesave sociale që blihen në treg; si dhe objekteve të dala jashtë funksionit, të transformuara në banesa sociale. Sakaq, masa e qirasë, e shprehur në lekë/ m2 , do të llogaritet në varësi të kostos së ndërtimit ose të vlerës së blerjes së banesës në treg, por masa vjetore e saj nuk mund të jetë më e madhe se 3% e kostos së ndërtimit, ose e vlerës së banesës së blerë në treg. "Për llogaritjen e masës së qirasë për banesat sociale që sigurohen nëpërmjet ndërtimeve të reja, në koston e ndërtimit ( K) përfshihen të gjitha shpenzimet e kryera për ndërtimin e objektit të banimit, të tilla si: vlera e investimit për ndërtimin e ndërtesës, vlera e plotë e projektit teknik, kostoja e blerjes së tokës, kur ajo nuk është pronë e njësisë së vetëqeverisjes vendore, vlera e investimit për lirimin e sheshit të ndërtimit, vlera e mbikëqyrjes së punimeve, taksat, tatimet dhe tarifat e aplikueshme gjatë ndërtimit të objektit, kostot e menaxhimit të zbatimit të projektit, kostot për kolaudimin dhe ato për tarifën e regjistrimit të pronës në Agjencinë Shtetërore të Kadastrës ( ASHK)", - thuhet në vendim. Në këtë të fundit më tej thuhet se në koston e ndërtimit nuk përfshihen vlera e truallit kur investimi është bërë në truall, pronë e njësisë së vetëqeverisjes vendore; investimet për lidhjen me rrjetin kryesor të infrastrukturës, si ujësjellës, kanalizime, telefoni, energji elektrike; vlera e investimit për katet e para, kur këto nuk janë të parashikuara për banesa sociale; taksat, tatimet dhe tarifat vendore, të cilat, për projektin në fjalë, mund të jenë konsideruar si kontribut i njësisë së vetëqeverisjes vendore. Për objekte të dala jashtë funksionit, të përshtatura në banesa sociale, masa e qirasë do të llogaritet mbi vlerën kapitale të transferuar dhe kostot e ndërhyrjes për përshtatjen e tyre. Në këtë vlerë përfshihen: vlera kapitale e transferuar e objektit, duke llogaritur edhe shkallën e amortizimit për shkak të përdorimit normal dhe të zakonshëm të tij; kostoja e ndërhyrjes/ investimit për përshtatjen e tyre në banesë sociale; tarifa për regjistrimin e pasurisë; çdo shpenzim tjetër, i kryer me financime të buxhetit të shtetit ose të njësisë së vetëqeverisjes vendore.
QIRATË PËR APARTAMENTET
Për llogaritjen e masës së qirasë mujore për çdo apartament, fillimisht llogaritet qiraja e përgjithshme vjetore për të gjithë objektin, duke shumëzuar me 3% koston totale që ka dalë nga llogaritjet; më tej llogaritet përqindja që zë sipërfaqja e çdo apartamenti ndaj sipërfaqes totale të ndërtimit. Përqindja, që rezulton nga ky veprim, shumëzohet me vlerën e përgjithshme vjetore të qirasë, ndërsa vlera që rezulton nga veprimi sipas shkronjës ' c' pjesëtohet me numrin 12.
BLERJET NË TREG
Për banesat sociale që blihen në treg, masa e qirasë llogaritet në bazë të vlerës së blerjes së banesës në treg. Në këtë vlerë përfshihen: vlera e investimit për blerjen e banesës, shpenzimet për riparime, kostoja për regjistrimin e pronës, taksat dhe tarifat e aplikueshme, çdo shpenzim tjetër i paparashikuar. "Në rastin kur në katet e para të objektit të ndërtuar janë parashikuar mjedise shërbimi, qiraja e tyre, në varësi të destinacionit, mund të përcaktohet sipas nivelit të qirave të objekteve të ngjashme në treg. Për çdo objekt të ri që ndërtohet, adaptohet ose blihet në treg, masa e qirasë llogaritet vetëm një herë dhe miratohet me vendim të këshillit të njësisë së vetëqeverisjes vendore. Ky nivel qiraje përdoret deri në fund të muajit janar të vitit pasardhës. Çdo vit, niveli i qirasë së miratuar nga këshilli i njësisë së vetëqeverisjes vendore shumëzohet me indeksin e ndryshimit të çmimeve të konsumit dhe miratohet nga këshilli i njësisë së vetëqeverisjes vendore", - nënvizohet në vendimin e qeverisë. Ndërkohë, për çdo njësi banimi, zyrat përkatëse në njësinë e vetëqeverisjes vendore mbajnë evidenca të plota, sipas formularit tip, me shpjegimet përkatëse. Të ardhurat që mblidhen nga qiratë, derdhen në një llogari të veçantë, të çelur me vendim të këshillit të njësisë së vetëqeverisjes vendore në një bankë të nivelit të dytë ose në degën e thesarit, duke përcaktuar, për çdo rast, përgjegjësitë e entit menaxhues dhe të strukturave përkatëse në njësinë e vetëqeverisjes vendore për mënyrën e përdorimit, të raportimit e të kontrollit të përdorimit të këtyre të ardhurave. "Vendimi nr. 260, datë 24.2.2010, i Këshillit të Ministrave, ' Për metodikën e llogaritjes së masës së qirasë, kur banesat sociale me qira financohen nga buxheti i shtetit ose buxheti i bashkive apo nga kombinimi i të dyjave', shfuqizohet. Ngarkohen njësitë e vetëqeverisjes vendore për zbatimin e këtij vendimi", - bëhet me dije në Fletoren Zyrtare.