Krali merr bashkinë, protestuesit përplasen me policinë, sulmojnë prefekten
Përveç
Devollit edhe në Kavajë ka qenë dje një situatë e tensionuar, ku nuk kanë munguar edhe përplasjet fizike. Kryetari i ri Bashkisë së Kavajës Redjan Krali ka mundur të hyjë në zyrën e tij vetëm pasi ka mbaruar orari zyrtar i punës dhe kryebashkiaku demokrat Isa Sakja është larguar nga bashkia. Shkak është protesta e mbështetësve të PD- së, të cilët nuk e kanë lejuar atë dhe prefekten që të shkojë në zyrë. Protesta është shoqëruar edhe me tensione të forta ku nuk kanë munguar përplasjet e militantëve të PD me policinë në mënyrë që të mos hyjë kryebashkiaku i ri Redjan Krali. Ata kanë sulmuar edhe prefekten e qarkut të Tiranës, Suzana Jahollari, e cila po mbante një konferencë për shtyp ku po sqaronte procedurat ligjore për konstituimin e Këshillit Bashkiak. Ndërkohë që kryetari aktual i Bashkisë së Kavajës, Isa Sakja, i cili ka deklaruar se nuk do ta lërë bashkinë atyre që kanë dalë nga votime ku morën pjesë vetëm 5 për qind. "Vazhdoj detyrën, nuk mund të lë bashkinë kur vetëm 5 për qind e qytetarëve të Kavajës kanë votuar", - tha Sakja. Protestuesit janë shprehur të vendosur për të mos lejuar kryebashkiakun e ri të që hyjë në bashki, ndërkohë që Policia e Kavajës në një deklaratë për mediat ka bërë të ditur se do garantojë kalimin e detyrës së kryebashkiakut nga Sakja te Krajli. Ndërkohë që drejtuesja politike e PS për qarkun e Tiranës, Elisa Spiropali, ka deklaruar dje nga Kavaja se kryetar i Bashkisë është Redjan Krali dhe se askush nuk do të mund të pengojë punën e PS dhe të kryetarëve të rinj. "Do nisim punën që nesër. Nuk i pengon dot asnjë huligan dhe asnjë çetë. Organet ligjzbatuese të bëjnë punën e tyre", - tha Spiropali. Ndërkohë që pas përfundimit të orarit zyrtar Krali i shoqëruar edhe nga përkrahës të PS ka hapur derën me forcë dhe ka hyrë në zyrë.