Ibrahimaj: Tatimet, kontrolle në 1200 pika karburanti
Kontroll për karburantet/ 32 kompani janë në ndjekje penale për evazion fiskal Aksion për kalibrimin e pompave dhe hetime për fshehjen e taksave
Drejtoria e Përgjiths hme e Tatimeve do të nisë një aksion në të gjithë vendin dhe do të kalojë në sitë 1200 pika që shesin karburant. Gjatë këtij aksioni do të kalibrohen edhe 3200 pompa. Drejtoresha e përgjithshme e Tatimeve, Delina Ibrahimaj, deklaroi se të gjitha pikat e tregtimit të karburanteve do të përballen me vizita të thelluara fiskale nga ana e inspektorëve tatimorë. "Me urdhër të ministres së Financave, Drejtoria e Tatimeve dhe metrologjia do të kalojnë në kontroll të gjitha kompanitë e karburanteve, të përcaktuara si një nga sektorët me riskun më të lartë për fshehje taksash dhe shkelje të ligjit", tha ajo. Vendosja e kompanive të naftës në shënjestrën e administratës tatimore ka ardhur pas një investigimi të kryer nga hetimi tatimor gjatë muajve të fundit. Emrat e kompanive të dërguara për ndjekje penale mbahen sekret për shkak të hetimit nga prokuroria. Por, drejtoresha e Tatimeve tha se kontrollet nuk do të kursejnë asnjë pikë tregtimi. Veç kompanive të karburante, një tjetër sektor që do të jetë në sitën e tatimeve gjatë muajit të ardhshëm është e dhe ndërtimi. Ndërkohë për korrikun, administrata tatimore ka kontrolluar rreth 1930 subjekte, duke konstatuar mbi 800 shkelje të ligjit.
AKSIONI
Rreth 41% e bizneseve që u kontrolluan në periudhën 1- 31 korrik në kuadër të planit operacional kundër informalitetit janë gjetur me shkelje. Drejtoria e Përgjithshme e Tatimeve bëri të ditura shifrat sot gjatë një daljeje të kreut të këtij institucioni, Delina Ibrahimaj. Në fjalën e saj, Ibrahimaj u shpreh se gjatë muajit që lamë pas fokusi i planit anitinformalitet ishte te subjektet "biznes i madh", kryesisht në hidrokarbure, ndërtim dhe hoteleri. "Për arsye të specifikave të sezonit turistik, strukturat e monitorimit në terren, në bashkëpunim me DPD, Inspektoratin e Punës, ISHTI, gjatë periudhës 01- 31 korrik kanë kontrolluar 1,933 subjekte, ndërsa janë konstatuar 803 shkelje të legjislacionit tatimor. Kemi identifikuar dhe po vazhdojmë të monitorojmë, regjistrimin e njësive akomoduese, deklarimin e punonjësve dhe respektimin e detyrimeve të tjera ligjore, për të vendosur rregullat e konkurrencës së ndershme për të gjithë. Krahas strukturave të monitorimit në terren, Hetimi Tatimor, gjatë muajit Korrik ka referuar mbi 30 dosje në prokurori, kryesisht me subjekte të mëdha që operojnë në fushën e ndërtimit dhe të hidrokarbureve. Plani operacional do të vazhdojë për goditjen e veprimtarisë së paligjshme në fushën e hidrokarbureve, ku janë të nevojshme vizita fiskale të thelluara për të identifikuar, parandaluar dhe luftuar evazionin fiskal, falsifikimin e dokumenteve dhe ndërhyrjet në pompat e karburanteve. Në lidhje me sistemet fiskale të karburanteve, në vijim të gjetjeve të Hetimit Tatimor, të cilat konkluduan në arrestimin e dy personave, nga sot me urdhër të ministrit të Financave dhe Ekonomisë, Drejtoria e Përgjithshme e Tatimeve ( DPT) dhe Drejtoria e Përgjithshme e Metrologjisë, ( DPM) do të kryejnë inspektime të përbashkëta pranë subjekteve të tregtimit të hidrokarbureve, me qëllim verifikimin e përmbushjes së detyrimeve ligjore nga ana e tyre dhe certifikimin e regjimit, i cili duhet të jetë automatik. Inspektimi do të mbulojë të gjithë territorin e vendit, në të gjitha pompat që mundësojnë ndryshimin e regjimit nga automatik në manual; për pompat e bllokuara nga strukturat e hetimit tatimor të evidentuara duke transmetuar në regjim manual; si dhe në të gjitha rastet e tjera.
CERTIFIKIMI TEKNIK
Për të gjitha pompat do të kryhet certifikimi teknik nga ana e Drejtorisë së Përgjithshme të Metrologjisë nën mbikëqyrjen e Inspektoreve Tatimor. Ky proces i certifikimit të regjimit automatik në tregtimin e hidrokarbureve është në vazhdën e planit të gjerë operacional kundër informalitetit, i cili përgjatë gjithë muajit gusht do të fokusohet te karburantet, për të garantuar respektimin e rregullit "pa kupon s'ka karburant", për të gjithë operatorët në këtë sektor, duke nisur nga më të mëdhenjtë deri te më të vegjlit. I gjithë plani operacional synon formalizimin e ekonomisë shqiptare, me qëllim që paratë e konsumatorëve të shkojnë për përmirësimin e shërbimeve ndaj tyre, për investime në arsim, shëndetësi, infrastrukturë publike dhe jo në xhepat e bizneseve abuzuese, të cilët cenojnë konkurrencën e ndershme dhe mirëqenien e individëve", tha Ibrahimaj.