Zguri thërret mbledhjen e KQZ, anëtarët e majtë do bojkotojnë
"30 qershori 2019 nuk konsiderohet datë ligjore zgjedhjesh"
Kryetari i Komisionit Qendror të Zgjedhjeve ka thirrur gjatë ditës së sotme mbajtjen e mbledhjes së posaçme me rend dite shqyrtimin e kërkesës së disa partive opozitare për nisjen e procedurave për organizimin e zgjedhjeve vendore në 13 tetor. Lajmin e ka bërë publik vet KQZ nëpërmjet një njoftimi të shpërndarë në media ku theksohet se me kërkesë të Partisë Republikane, PAA dhe LSI, KQZ do të zhvillojë gjatë ditës së sotme një mbledhje ku do të shqyrtojë kërkesën e tyre për nisjen e procedurave organizative për zgjedhjet vendore. "Komisioni Qendror i Zgjedhjeve, ditën e shtunë, më datë 03.08.2019, ora 10: 00, zhvillon mbledhjen me këtë rend dite: Shqyrtimi i projekt vendimit "Për shqyrtimin e kërkesës paraqitur nga partia Republikane e Shqipërisë, partia Agrare Ambientaliste e Shqipërisë dhe partia Lëvizja Socialiste për Integrim "Për fillimin e procedurave për zgjedhjet për organet e qeverisjes vendore të datës 13.10.2019", - thuhet në njoftimin e KQZ- së. Por burime nga KQZ kanë bërë të ditur mbledhja është thirrur nga kryetari i KQZ- së Klement Zguri dhe pritet që anëtarët e propozuar nga e majta të mos marrin pjesë, duke e bërë praktikisht të pamundur mbajtjen e saj.
LETRA
Pas konsultimit me kryetarin e opozitës, Lulzim Basha disa nga partitë aleate të PD- së, i janë drejtuar dje me një letër zyrtare Komisionit Qendror të Zgjedhjeve ku i kërkojnë atij që të hapë procesin e organizimit të zgjedhjeve vendore të 13 tetorit, sipas dekretit të Presidentit të Republikës. Letra është dërguar nga LSI, PR dhe PAA dhe në të ato argumentojnë se nuk e njohin 30 qershorin si datë të zgjedhjeve lokale, pavarësisht se ato u zhvilluan në 61 bashkitë e vendit. Ato thonë se njohin dekretin e Presidentit dhe bazuar në të kërkojnë nisjen e procedurave. "Data 30 qershor 2019 nuk konsiderohet datë ligjore zgjedhjesh për organet e qeverisjes vendore pasi Presidenti i Republikës, me Dekretin Nr. 11 199, datë 10.06.2019 shfuqizoi datën 30 qershor 2019, si datë për zhvillimin e zgjedhjeve për organet e qeverisjes vendore. Misioni i ODIHR, në raportin e gjetjeve paraprake ka konstatuar se "Zgjedhjet vendore të 30 qershorit u mbajtën pa e marrë shumë në konsideratë interesin e elektoratit. Gjërat u bënë edhe më komplekse për shkak të mungesës së një Gjykate Kushtetuese dhe një Gjykate të Lartë funksionale, ku e para është i vetmi organ i mandatuar
për të vendosur në lidhje me kushtetueshmërinë e dekreteve të Presidentit", - thuhet në letrën e firmosur nga Fatmir Mediu, Agron Duka dhe Endrit Braimllari. Më tej ato sqarojnë se sipas dekretit të datës 27 qershor, mbetet në fuqi 13 tetori si data e ligjshme e organizimit të zgjedhjeve, ndaj dhe KQZ duhet të nisë sa më
KËRKESA
"Duke mbajtur në konsideratë se, më datë 27.06.2019, Presidenti i Republikës caktoi si datë të re zgjedhjesh, datën 13 tetor 2019, dekret i cili është në fuqi dhe i pa kontestuar nga askush, KQZ ka detyrimin ligjor që pas dekretimit të datës së zgjedhjeve të fillojë përgatitjet për organizimin dhe mbarëvajtjen e procesit zgjedhor. Ndaj kërkojmë nga ana juaj marrjen pa vonesë të të gjitha masave përkatëse për të organizuar procesin zgjedhor të datës 13.10.2019, sipas Dekretit të Presidentit në fuqi"