Kontrolli i karburanteve, Braçe: Kemi gjetur evazion fiskal
Tatimet në aksion, do të kontrollohet çdo pompë karburanti, skema si bëhet evazioni Zv. kryeministri, në terren kundër veprimtarive kriminale të organizuara
Tatimet dhe Drejtoria e Përgjithshme e Metrologjisë kanë nisur aksionin për kontrollin e karburanteve. Në fokus të tyre janë pompat, kalimi i tyre nga regjimi automatik në atë manual. Aksioni u ndoq edhe nga zëvendëskryeministri Erjon Braçe, i cili shoqëronte drejtoreshën e Tatimeve, Delina Ibrahimaj. Ai nënvizoi se historia e shitjes së karburantit pa kupon duhet të përfundojë njëherë e mirë. Z. Braçe ngriti shqetësimin për nivelin e lartë të evazionit fiskal në këtë sektor. "Është një sjellje konstante e qeverisë në betejë kundër informalitetit, transaksioneve të paligjshme dhe që për fat të keq deri vonë në evazion fiskal. Tregu i karburanteve është tregu më i madh në vend dhe jemi të detyruar të përqendrohemi shumë fort në këtë treg, me qëllim që të legalizojmë dhe legjitimojmë çdo transaksion përmes kuponit tatimor dhe faturës tatimore, qoftë ky një litër, qoftë ky një autobot", - tha Braçe. Zëvendëskryeministri u shpreh se problemet e konstatuara gjatë një kontrolli të kryer në fillim të muajit korrik kanë detyruar institucionet të rikthehen sërish në gusht. "25 ditë të shkuara është zhvilluar një kontroll në tregun e karburanteve në zonën Elbasan- Tiranë- Durrës dhe ku për fat të keq kemi gjetur evazion fiskal dhe veprimtari kriminale të organizuar. Struktura e Hetimit Tatimor ka kallëzuar në Prokurorinë e Elbasanit këtë aktivitet kriminal dhe për këtë arsye dy ditë të shkuara janë vënë në pranga persona të një kompanie që manipulonte kasat fiskale të pompave të karburantit. I kalonte në regjim manual, i ndaluar me ligj. Për këtë arsye jemi rikthyer në tregun e karburanteve, duke filluar nga
shumica tek sh. a në Porto Romano, që herën e parë i gjetëm në regjim manual për t'i kaluar në regjim automatik dhe vendosur aparatet fiskale. Procesi do të zhvillohet me çdo pompë me shumicë dhe pakicë në gjithë vendin. Kjo histori ka filluar dhe nuk mbaron", - deklaroi Braçe. Sipas tij, përmes këtij aksioni presin të verifikojnë deklarimin e shitjeve dhe TVSH- së, që duhet të arkëtojnë nga çdo shitje. Një apel pati për të gjitha subjektet që ushtrojnë aktivitetin në tregun e karburanteve, por jo vetëm. "Kam një thirrje për secilin. Të jenë në rregull me ligjin, të mos i bien telefonit të askujt nëse nuk janë në rregull me ligjin. Nuk i hapet telefoni, mund t'i hapet, por nuk e ndihmon askush deri në momentin që do të kthehet në ligjshmëri", - deklaroi numri dy i qeverisë. Ndërsa drejtoresha e Tatimeve, Delina Ibrahimaj, nënvizoi se historia e shitjes së karburantit pa kupon duhet të përfundojë njëherë e mirë. Sipas drejtoreshës së Tatimeve, lufta antiinformalitet ka në epiqendër disa sektorë të njoftuar si ndërtimi, turizmi e hidrokarburet, të cilët po shihen në imtësi nga plani operacional që po zbaton Drejtoria e Përgjithshme e Tatimeve. Kreu i kësaj drejtorie, Delina Ibrahimaj, gjatë njoftimit të rezultateve të korrikut dhe mënyrës sesi do të vijojë puna për gushtin zbardhi edhe detaje lidhur me mënyrën sesi funksionon skema e evazionit nga kompanitë e karburanteve. "Legjislacioni në fuqi nuk lejon që karburantet të shesin në regjim manual pra nëse karburantet kanë një problem me funksionimin e pompës dhe nuk mund të printojnë kasa, ato do të duhet të ndërpresin shitjen e tyre dhe të raportojnë tek administrata tatimore apo te kompanitë e kasave, nëse ka problematikë me kasat. Gjetjet e hetimit të kryer gjatë muajve të fundit që konkluduan me arrestimin e dy personave këtë javë kanë konstatuar se në shumë karburante bëhen ndërhyrje në pompat e tyre , duke i kaluar nga regjimi automatik në regjim manual. Qëllimi i inspektimit është pikërisht identifikimi i këtyre karburanteve dhe certifikimi i regjimit automatik. Në rast se karburantet do të gjenden se janë duke operuar në regjim manual, atëherë do të bllokohen nga inspektorët e Tatimeve. Në momentin që ato janë në regjim automatik, do të certifikohen nga Drejtoria e Përgjithshme e Metrologjisë dhe do të plumbosen po nga ajo, në mënyre që nëse do të ketë raste të përsëritura të karburanteve që operojnë në këtë regjim, inspektorët tatimorë do të kenë mundësi të verifikojnë regjimin dhe në të kaluarën. Ne do të prekim të gjithë territorin e vendit. Janë 1200 subjekte dhe rreth 3200 pompa, të cilat do të inspektohen dhe do të plumbosen" tha Ibrahimaj.