Aksioni antiinformalitet në Durrës dhe Vlorë, lirohen 2000 m2 plazhe të zaptuara

Kontrolli/ Policia: Janë proceduar penalisht 12 pronarë subjektesh

Policia e Shtetit e ka vijuar dje kontrollin e saj në plazhin e Durrësit dhe të Vlorës, për parandalimin, evidentimin dhe ndëshkimin e informalitetit, evazionit fiskal në turizëm, ndërtim, hidrokarbure, mallra të akcizës dhe krimeve të tjera mjedisore. Mësohet se në Durrës janë liruar rreth 2000 m2 plazh i zaptuar në mënyrë të kundërligjshme, ndërsa janë proceduar 12 pronarë subjektesh, nga këta 6 në Durrës e 6 në Vlorë, për veprat penale "Zënia e hapësirave publike", "Fshehja e të ardhurave", "Moslëshimi i kuponit tatimor", "Punësimi i paligjshëm" dhe "Pushtimi i tokës". Specialistët për Hetimin e Krimit Ekonomik e Financiar në Drejtorinë Vendore të Policisë Durrës, në bashkëpunimin me TaskForcën e ngritur nga prefekti i qarkut Durrës dhe Policinë Bashkiake, kanë nisur procedimin në gjendje të lirë për shtetasit: L. B., F. B., O. D., F. R., A. C. dhe S. B., të gjithë banues në Durrës. Procedimi ndaj tyre filloi, pasi nga kontrolli i ushtruar, u konstatua se këta shtetas kishin zënë me çadra plazhi, hapësirat publike në bregun e detit pa leje nga organet përkatëse.

Ndërkohë në Vlorë policia ka proceduar penalisht 6 administratorë subjektesh në Radhimë dhe Himarë, konkretisht shtetasit B. D., P. K, M. K, M. Dh., S. Sh. dhe A. Z. Këta subjekte tregtare në plazhet e Radhimës dhe Gjipesë akuzohen se kanë ushtruar aktivitetin "Plazh privat" me mungesë të theksuar

dokumentacioni, nuk lëshonin kupona tatimorë dhe nuk kishin kontratë qiraje me bashkitë përkatëse.

Po ashtu bëhet e ditur nga policia se operacioni do të vijojë në gjithë zonën bregdetare, për të kthyer në dispozicion të qytetarëve çdo hapësirë publike të zënë në mënyrë të

kundërligjshme, me qëllim fitimin. Dy ditë më parë aksioni antiinformalitet u zhvillua në plazhin e Velipojës në Shkodër dhe atë të Shëngjinit në Lezhë ku u lirua dhe u vu në dispozicion të pushuesve rreth 4500 m2 plazh, pronë publike, të zaptuar në mënyrë të kundërligjshme nga 6 subjekte. Nga këto 3500 m2 në Shëngjin dhe 1000 m2 në Velipojë. Sekuestrohen rreth 450 shezlongë dhe 250 çadra. Procedohen penalisht 6 shtetas, nga të cilët 4 në Shëngjin dhe 2 në Velipojë. Procedohet përsëri për "Shpërdorim detyre" shtetasi A. N., me funksion Drejtor në Drejtorinë e Taksave dhe Tarifave Vendore në Bashkinë Lezhë, për katër rastet e fundit të konstatuara në Shëngjin. Vetëm tri ditë më parë, policia vijoi aksionin në jug të vendit dhe konkretisht në Ksamil, Sarandë Vlorë dhe në Divjakë. Nga ky aksion u liruan 10 mijë m2 plazh në Ksamil, ndërsa u procedua penalisht nënkryetari i Bashkisë Sarandë, Jorgo Mitro.