Trafikonte armë, fishekë dhe tritol nga Serbia në Shqipëri, lihet në burg kosovari
Hetuesit: Dyshohet se armët do përfundonin në duart e grupeve kriminale në Elbasan 51- vjeçari Ylber Ademi u arrestua tri ditë më parë në aksin rrugor Elbasan- Peqin
Gjykata e Krimeve të Rënda ka caktuar dje masën e sigurisë "arrest me burg" për kosovarin, Ylber Ademin, i cili u arrestua tri më parë në Elbasan me arsenal armësh. Gjatë arrestimit, 51- vjeçarit ( pronar i një klubi nate iu sekuestruan 16 pistoleta dhe 4 kallëp të dyshuar lëndë plasëse ( tritol) si dhe disa telefona celularë.
Ai arrinte të siguronte armët në Serbi dhe më pas i shiste në vendin tonë. Informacioni për Ademin është marrë nga policia që me 24 qershor 2019. Për të faktuar nga ana e policisë se Ademi po merret me trafikim armësh është bërë edhe blerje e stimuluar. Policia e ka mbajtur në vëzhgim Ylber Ademin për të bërë të mundur zbardhjen e personave, të cilët mund të kishin porositur armët. Por në bazë të kontrolleve të ushtruara nga ana e policisë nuk kanë rezultuar persona të tjerë të përfshirë. Ylber Ademi rezulton të jetë pronar i një klubi nate në Podujevë. 51vjeçari dyshohet se është person i përfshirë në botën e krimit, në trafik armësh dhe droge. Madje, edhe në arredimin e ambienteve të brendshme të lokalit, në qendër shfaqet personazhi kryesor i filmit të njohur mafioz "The Godfather", Vito Corleone. Hetuesit kanë dyshime të forta se armët dhe municionet do të përfundonin në duart e grupeve kriminale që veprojnë në Elbasan, por deri tani nuk ka asnjë të dyshuar. Gjatë marrjes në pyetje, 51- vjeçari nga Kosova nuk ka treguar destinacionin final të armëve, por ka rrëfyer se ato i ka marrë në Serbi.
NJOFTIMI I POLICISË
Drejtoria Hetimore Qendrore pranë Departamentit të Policisë Kriminele në Policinë e Shtetit, pas informacioneve të marra në rrugë operative për një trafik të mundshëm të armëve dhe municioneve luftarake nga Serbia në Kosovë e më pas në Shqipëri, referoi materialet në Prokurorinë e Krimeve të Rënda, ku u regjistrua procedimi penal i vitit 2019, për veprën penale "Trafikimi i armëve dhe i municioneve" .
Nën drejtimin e Prokurorisë së Krimeve të Rënda u
kryen hetime proaktive, të cilat çuan në finalizimin me sukses të operacionit "Papër". Në bashkëpunim me Drejtorinë Vendore të Policisë Elbasan dhe Drejtorinë e Forcës së Posaçme Operacionale në Policinë e Shtetit, në rrugën nacionale El
basan- Peqin, u kap në flagrancë shtetasi:
Y. A., 51 vjeç, lindur në Kacandoll dhe banues ne Podujevë, Kosovë. Ky shtetas u kap në flagrancë duke transportuar me automjetin e tij armë luftarake, municion dhe lëndë shpër
thyese TNT, të cilat i siguronte në Serbi e në vende të tjera, më pas i transportonte në Kosovë me destinacion final Shqipërinë.
Armët dhe municionet ishin fshehur në vende të posaçme të krijuara në automjetin e tij, si në motor, kabinë, bagazh e kroskot.
Në cilësinë e provës materiale u sekuestruan 19 armë zjarri të llojit pistoletë, të markave të ndryshme, 400 fishekë luftarak, 4 kallëpe lënde eksplozive të llojit TNT, me peshë të përgjithshme 1.6 kg, 3 telefona dhe automjeti që transportonte armët.
Në bashkëpunim me Prokurorinë e Krimeve të Rënda vijon puna për dokumentimin e plotë të këtij aktiviteti kriminal, identifikimin e personave që kanë bashkëpunuar me personin e arrestuar, pasi nga veprimet e deritanishme proaktive rezulton se ky shtetas ka shitur edhe më parë armë luftarake, në Kosovë, Shqipëri e vende të tjera.
Policia e Shtetit është e angazhuar maksimalisht për të zbuluar dhe ndëshkuar cilindo që kryen veprimtari të paligjshme dhe në këtë kuadër fton qytetarët të denoncojnë në numrin 112 të Policisë së Shtetit apo në Komisariatin Dixhital çdo rast paligjshmërie, duke ju garantuar anonimat të plotë, reagim të shpejtë dhe të paanshëm.