Stina e re politike, LSI: Opozita, e gatshme për bashkëpunim me PS- në
"Kronika e zezë, si ' database' e Rilindjes", Paloka: Do të këpusim nyjën gordiane të Ramës me krimin" Duka: Zgjidhja e krizës, duhet qeveri tranzitore
Nënkryetari i PD- së, Edi Paloka, akuzoi dje kryeministrin Edi Rama për lidhje të forta me krimin dhe situatën kriminale në vend. Sipas Palokës, kronika e zezë është si ' database' e Rilindjes dhe bashkëpunëtorëve të Ramës. Paloka vëren se është e pamundur që çdo ditë në lajmet e kronikës të mos hasësh një deputet, kryebashkiak apo funksionar të lartë të kryeministrit. "Kronika e zezë si ' database' e ' rilindjes'. Në çdo lajm lexon CV e një bashkëpunëtori të Ramës! Është e pamundur të ndjekësh kronikën e zezë e mos shohësh Ramën! Çdo ditë e në çdo lajm do të ketë o një deputet, o një kryebashkiak, o një funksionar të larte të Ramës.
Sot, ( dje) për shembull është arrestuar një përdhunues ( një të tillë Edvini e emëroi kryetar bashkie); një hajdut shtëpish ( Rama e kishte një në listën e deputetëve); një trafikant femrash ( edhe këtë kategori Edi Rama e bëri deputet). Nëse sot do të ndodhë ndonjë vrasje ( siç kanë ndodhur rëndom këtë muaj), do të kapej në vendet fqinjë edhe ndonjë trafikant droge ( se në Shqipëri, Lleshi kap fshatarët) lista e bashkëpunëtorëve politikë të Ramës do të bëhej e plotë", shprehet z. Paloka. Nënkryetari demokrat akuzon se kryeministri Rama nuk ka jetë politike pa krimin. "Janë bashkë në rrëmbimin dhe ushtrimin e pushtetit. Pushteti dhe paratë e zeza janë nyja gordiane që mban lidhur Ramën dhe krimin. Kjo nyje duhet këputur dhe do të këputet, përndryshe fatkeqësitë nuk do të rreshtin për shqiptarët", deklaroi z. Paloka.
ALEATËT
Kryetari i PAA, Agron Duka ishte dhe në fshatin Vishaj, nga ku njoftoi se partia e tij po përgatitet për fillimin e një stine të re politike. Duka theksoi se PAA po përgatitet për fillimin e një stine të re politike, ku çelësat e zgjidhjes së krizës nuk i ka mazhoranca, por opozita. Ai shton se vullneti për të mos pranuar asnjë marrëveshje, veç asaj me të cilën do të ngrihet një qeveri tranzitore dhe do të përgatiten kushtet e nevojshme që vendi të shkojë në zgjedhje të lira dhe të ndershme është garancia që kriza të tilla nuk do të përsëriten më. Agron Duka nënvizon se pasi të bëhet qeveria tranzitore dhe në parlament e në pushtetin lokal të jenë vërtetë njerëz që i shërbejnë popullit, do të ketë një ndryshim rrënjësor të situatës edhe në bujqësi. Kurse ish- deputeti i LSI, Shezai Rrokaj, tha se opozita është e gatshme për bashkëpunim me PS- së, por kjo e fundit të mos ketë statusin e qeverisë. Rrokaj u shpreh për "Ora News" se opozita do të vazhdojë aksionin me protesta. Sipas tij, duhet të jetë mazhoranca, ajo që duhet të hedhë hapin e para në një bashkëpunim politik. "Opozita gjithmonë e ka shprehur vullnetin e saj për një marrëveshje me PS- në, një marrëveshje duke mos njohur statusin e qeverisë së kësaj mazhorance, sepse sipas opozitës, kjo qeveri ka ardhur në pushtet me vota të blera. Këtë shtator opozita do të vazhdojë aksionin opozitar të protestës. Opozita ka propozuar pikat e para të bashkëpunimit politik me mazhorancën në 3 drejtimet themelore, që është vetingu në politikë, dekriminalizimi i ekonomisë dhe dekriminalizimit të zgjedhjeve. Ky shtator duhet të jetë një apel, refleksion i thellë për mazhorancën, e cila duhet të hedhë hapin e parë të bashkëpunimit. Bashkëpunimi nuk mund të vendoset mes një kryetari partie që përfaqëson opozitën, që është Basha dhe kryeministrit. Bashkëpunimi bëhet në rangje politike, kryetarë partish", deklaroi z. Rrokaj. Sipas tij, opozita duhet të vazhdojë me ngulm protestat dhe t'u paraqesë shqiptarëve alternativën më të mirë qeverisëse. "Mazhoranca nuk mund të vazhdojë të bëjë sikur është në shinat e drejta të demokracisë. Nga ana tjetër opozita duhet të vazhdojë me ngulm protestat dhe bashkëpunimin me ndërkombëtarët për t'i sensibilizuar më shumë ndërkombëtarët. Mbi të gjitha, opozita duhet të ketë dy detyra themelore, çarë u propozon gjë të re shqiptarëve dhe me cilin ekip ajo kërkon besimin e qytetarëve shqiptarë në qeverisjen e ardhshme. Kjo rrugë çon në rritjen e fluksit të atyre që e kërkojnë ndryshimin", - u shpreh ish- deputeti i LSI- së.