Kuvendi nis punimet, brenda 3 javëve rrëzohen të gjitha dekretet e Metës
Mazhoranca e majtë pritet të rrëzojë rreth 11 dekrete të kreut të shtetit Shkarkimi i Metës, në dorë të Komisionit të Venecias
Nis sot sesioni i ri par lamentar dhe bashkë me të edhe sezoni i ri politik në vend. Ashtu si edhe shtatorin e shkuar, edhe kësaj here Kuvendi do t'i nisë punimet pa pjesëmarrjen e opozitës reale ( kujtojmë se edhe një vit më parë opozita e kishte bojkotuar Kuvendin), e cila ka vendosur që të mos e njohë më ligjshmërinë e tij dhe të qeverisjes së vendit si në nivel qendror, ashtu edhe atë vendor. Dhe në mungesë të opozitës tradicionale, jeta parlamentare brenda Kuvendit pritet të jetë e qetë, ndërsa do të vijojë beteja institucionale me Presidentin e Republikës.
SEANCA
Për nisjen zyrtare të punimeve, Kuvendi ka thirrur sot një seancë plenare që në fakt do të ketë vetëm vlerë formale, pasi përveç fjalës përshëndetëse të kryeparlamentarit Gramoz Ruçi, është parashikuar edhe miratimi i disa vendimeve që kanë të bëjnë me procesverbalin e mbledhjes së fundit apo edhe miratimin e kalendarit trejavor të punimeve si dhe të programit të punës për dy muajt e parë. Kështu, sa i përket programit të punimeve, plot 37 nisma, nga të cilat 11 dekrete të presidentit për kthime ligjesh, projektvendime si dhe reforma zgjedhore presin votën e ligjvënësve për t'u miratuar në Kuvend. Kreu i shtetit ktheu për rishqyrtim në parlament në muajt korrik e gusht një sërë ligjesh të miratuara nga mazhoranca, mes të cilave atë për ' Kadastrën', ' Noterinë', ' Akademinë e Shkencave', si dhe një sërë marrëveshjes koncesionare për ndërtim e mirëmbajtje rrugësh. Burime nga mazhoranca kanë bërë të ditur se Kuvendi nuk do marrë parasysh asnjë nga argumentet e dhëna nga kreu i shtetit në kthimin e këtyre ligjeve, ndaj dhe do t'i rrëzojë dekretet e tij. Gjithashtu, gjatë këtij programi Kuvendi pritet të rrëzojë edhe propozimin e Presidentit të Republikës për kryetar të Kontrollit të Lartë të Shtetit. Bëhet fjalë për emrin e Petraq Milos, i cili është dekretuar nga Meta si propozimi i tretë për këtë pozicion gati dy muaj më parë. Sipas mazhorancës, edhe ky propozim do të rrëzohet për shkak se Presidenti i Republikës nuk ka respektuar procedurën ligjore, pasi ka dekretuar një emër, i cili nuk ishte përfshirë në listën e personave që kishin aplikuar për këtë pozicion. Burime nga PS- ja kanë bërë të ditur se është parashikuar që të gjitha dekretet për kthim ligjesh dhe propozime emërimesh të Presidentit Meta do të rrëzohen brenda tri javëve të para të këtij sesioni. Në 12 shtator është parashikuar të rrëzohet dekreti për rishqyrtimin e ligjit: "Për rezervat materiale të shtetit", "Për privatizimin e ndërmarrjeve apo objekteve të veçanta", "Për vetëqeverisjen vendore" dhe ai "Për planifikimin dhe zhvillimin e territorit". Ndërsa në seancën e 19 shtatorit do të rrëzojnë dekretin për "Kodi Penal" dhe atë "Për koncesionet dhe partneritetin publik privat". Njëkohësisht, pritet që të lihen në fuqi dy ligjet që lejojnë ndërtimin me koncesion të dy akseve rrugore Orikum- Dukat dhe Milot- Balldren", si dhe të rrëzohet dekreti për ligjin "Për Akademinë e Shkencave".
SHKARKIMI
Por, kryefjalë e këtij sesioni do të vijojë të mbetet çështja e shkarkimit të Presidentit Ilir Meta. Mazhoranca përmes një komisioni hetimor kërkoi shkarkimin e kreut të shtetit, pas dekretit që presidenti nxori për shtyrjen e zgjedhjeve lokale të 30 qershorit. Shumica parlamentare edhe pse iu drejtua për opinion Komisionit të Venecias, i qëndron argumentit se kreu i shtetit ka shkelur Kushtetutën duke anuluar mbajtjen e vendoreve në 30 qershor. Por gjithsesi, shumica parlamentare dhe qeverisëse ka bërë të ditur se nuk do të procedojë me shkarkimin e Metës pa pasur më parë një opinion të Komisionit të Venecias. Ndërkohë që mësohet se lidhur me këtë çështje pritet të vijë në Shqipëri pas pak ditësh edhe një përfaqësi e Komisionit të Venecias për të marrë opinionet e palëve dhe juristëve në vend. Gjithsesi, komisioni hetimor duhet të dalë me një përfundim për këtë hetim brenda 3 tetorit, kur edhe i mbaron mandati 3- mujor, por nuk përjashtohet mundësia që ky afat të zgjatet më tej.