PD: Tirana pa ujë të pijshëm, rrezikohet shpërthimi i epidemive!
Partia
Demokratike ka denoncuar dje mungesën e ujit të pijshëm në Tiranë që nga zonat periferike, deri te zonat më të populluara në qendër të kryeqytetit. Ishdeputetja demokrate, Albana Vokshi, në një deklaratë nga selia blu tha se prej javësh mungon uji i pijshëm në disa zona të Tiranës, ndërsa theksoi se edhe kur uji vjen, është i ndotur dhe përbën rrezik për shpërthim epidemish. "Mijëra mesazhe e denoncime kanë mbërritur në Partinë Demokratike për mungesën e furnizimit me ujë në Tiranë. Dhjetëra lagje në kryeqytet ankohen se nuk furnizohen me ujë prej javësh, në lagje të tëra uji mungon mbi 20 orë në ditë, ndërsa faturat e ujit u shumëfishuan për të justifikuar vjedhjen galopante në Ujësjellësin Tiranë. Problemi i mungesës së ujit nuk është vetëm në periferi, por edhe në qendër të Tiranës. Denoncimet vijnë, jo vetëm nga Yzberishti, ' Astiri', ' Ali Demi', Lapraka, ' Uzina e Autotraktorëve', por edhe nga rruga ' Sami Frashëri', zona e ' Myslym Shyrit', zona e Bllokut etj. Nuk mjafton kjo, por qytetarët ankohen se uji vjen i ndotur në rubineta në rrezik shpërthimi epidemish", - tha Vokshi në deklaratën e saj. Ajo akuzoi kryebashkiakun Erion Veliaj se ka mashtruar shqiptarët me premtimet e tij për ujin, ndërsa theksoi se rritja e çmimit të tij nuk përmirësojë situatën e furnizimit të qytetarëve. "Është ERRU, institucion i pavarur, që në raportet e përformancës vjetore për ujësjellësit hedh poshtë këto mashtrime të kryebashkiakut. Erjon Veliaj e mori Ujësjellës- Kanalizime Tiranë me gati 11 orë furnizim ujë në ditë dhe sot, 4 vjet pasi u ul në karrigen e kryebashkiakut dhe 2 vjet pasi rriti çmimin e ujit, kohëzgjatja e furnizimit me ujë është e përkeqësuar", - tha Vokshi.