Arrestohet ish- drejtori në Gjirokastër, u dha energji dy afërmeve
Ish- deputeti Tavo ka akuzuar kryebashkiakun Golemi se ka sajuar historinë "Hakmarrje e kryetarit gaztor të paligjshëm"
Policia ka arrestuar dje ish- drejtorin e Agjen cisë së Mirëqenies dhe Kujdesit Social, Armand Mamani, që më parë ka qenë edhe kryetar i Lëvizjes Socialiste për Integrim në Gjirokastër. Ai akuzohet për shpërdorim detyre, pasi ka lejuar dy të afërmet e tij të vjedhin energjinë për një objekt dykatësh, të cilin e përdornin për aktivitet tregtar. Ndërkohë, bashkë me ish- drejtorin, në pranga ka rënë edhe një shtetase 40vjeçare dhe një tjetër është shpallur në kërkim. "Ndalohet ish- drejtori i Agjencisë së Mirëqenies dhe Kujdesit Social për veprën penale ' Shpërdorim detyre'. Arrestohet në flagrancë një shtetase për veprën penale ' Vjedhje e energjisë elektrike' dhe një shtetase tjetër shpallet në kërkim. Nga specialistët e Seksionit për Hetimin e Krimin Ekonomik e Financiar në D. V. P. Gjirokastër u ndalua shtetasi A. M., 49 vjeç, banues në Gjirokastër, për veprën penale ' Shpërdorim detyre', parashikuar nga neni 248 i Kodit Penal", - thuhet në njoftimin e policisë. Më tej policia bën të ditur se arrestimi, ndalimi dhe shpallja në kërkim i shtetasve të mësipërm u bë pasi në depon e A. M. K. S. Gjirokastër është konstatuar një kabull elektrik i lidhur në mënyrë të paligjshme, i cili përcillte energji elektrike në një objekt dykatësh, ambient i përshtatur për aktivitet tregtar, në përdorim nga shtetësia L. B dhe E. Zh., veprim i cili sipas
saj, është kryer me miratimin e ish- drejtorit të A. M. K. S. Gjirokastër, A. M., i cili i kishte të afërme shtetaset e mësipërme. Ndërkohë që veprimet hetimore janë kryer nën drejtimin e Prokurorisë së Rrethit Gjyqësor Gjirokastër dhe materialet procedurale i kaluan Prokurorisë Pranë Gjykatës së Shkallës së Parë Gjirokastër për hetime të mëtejshme. Por kjo ngjarje është bërë shkak për një përplasje të fortë mes LSI- së dhe kreut të ri të Bashkisë së Gjirokastrës, Flamur Golemi. Nëpërmjet një reagimi në rrjetet sociale, ish- deputeti i LSI- së për Gjirokastrën, Vagjel Tavo ka akuzuar në mënyrë të drejtpërdrejtë kryebashkiakun Golemi si nismëtar të kësaj goditjeje me prapavijë politike. Sipas Tavos, ishte pikërisht kryebashkiaku Golemi, ai që ndërmori një audit të befasishëm që në ditën e dytë të punës si kryetar bashkie dhe pasi nuk gjeti asnjë shkelje, sipas tij, ai shpiku çështjen e vjedhjes së energjisë elektrike. "Palo kryetari i ri i Bashkisë Gjirokastër, i cili në votimet më moniste të 30 qershorit, ku kandidoi përballë vetes, arriti rekordin për numrin më të vogël të votave nga partia që përfaqëson dhe ata 1500 votues që i detyroi me forcë ia quajtën votën e pavlefshme, pasi nuk mund të bëheshin zare të këtij gaztori. I kompleksuar me rekordin e votave më të ulëta, ky gaztor nisi shkarkimet politike. Armand Mamani, drejtor i Agjencisë së Mirëqenies dhe Kujdesit Social u përball ditën e dytë të punës së kryetarit gaztor me një audit të befasishëm kontrolli, i cili nuk gjeti asnjë shkelje. Ndërkohë u sajua një histori e turpshme për lidhje të paligjshme energjie elektrike", - shkroi Tavo. Ndaj, ish- deputeti i LSI- së u ka bërë thirrje institucioneve të drejtësisë, që kanë tashmë në dorë çështjen, që të mos bëhen vegla politike në duart e kryebashkiakut Golemi. "U bëj apel organeve të drejtësisë të mos përdoren politikisht dhe të mbrojnë të vërtetën, duke mos u bërë pjesë e arrogancës dhe hakmarrjeve të kryetarit gaztor të paligjshëm, të dalë nga zgjedhje antikushtetuese dhe me rekord të paparë dështimi votash", - tha Tavo. Mamani ka qenë drejtor i Agjencisë së Shërbimit dhe Mirëmbajtjes në Bashkinë e Gjirokastrës, si dhe drejtor i Spitalit Rajonal të Gjirokastrës.