Spiropali: Meta, pjesë e një skenari për destabilizimin e vendit
Mazhoranca
vijon të besojë se Presidenti i Repub likës, Ilir Meta, ishte pjesë e një skenari që kishte për qëllim destabilizimin e vendit. Ministrja për Marrëdhëniet me Parlamentin, njëherësh edhe zëdhënësja e qeverisë, Elisa Spiropali, e ftuar në rubrikën "Opinion", në "News 24" deklaroi se Presidenti i Republikës, Ilir Meta, ka shkelur me të dyja këmbët Kushtetutën dhe ka qenë pjesë e një skenari për destabilizimin e Shqipërisë. E pyetur nëse ka mazhoranca një emër të ri për zëvendësimin e Metës, pas nisjes së procedurave për shkarkimin e tij, ministrja ka thënë se si fillim do të bëhet hetimi përkatës në Komisionin hetimor Parlamentar. "Ne nuk rendim për të shkelur afatet, nuk e kemi diskutuar emrin e ri, nuk jemi në atë fazë. Aktualisht është ngritur komisioni për hetimin e dekreteve të presidentit, do vazhdojë procesi i hetimit dhe parlamenti do votojë. Pastaj, i takon Gjykatës Kushtetuese të vendosë, por për ne është shumë e qartë se Meta e ka shkelur Kushtetutën me të dyja këmbët dhe ka qenë pjesë e një skenari për të destabilizuar Shqipërinë. Nuk ka përfaqësuar interesin e popullit në asnjë çast", - deklaroi Spiropali. Ajo foli edhe për nisjen e sesionit të ri parlamentar, ku sipas saj synohet që të miratohet reforma zgjedhore. "Kemi një opozitë në parlament, e cila për hir të së vërtetës ka qenë produktive dhe për çështje madhore, që kanë të bëjnë me të ardhmen e Shqipërisë, ka qenë vendimtare. Kjo opozitë është shumë më e vlefshme se ajo në rrugë. Kemi përpara një sfidë dhe ajo është që të votojmë reformën zgjedhore. Duhet të bëjmë reformën zgjedhore. Komisioni i Posaçëm për Reformën Zgjedhore ka pikërisht këtë detyrë. Ka dhe një vend për opozitën jashtëparlamentare dhe shpresojmë që atë vend ata ta përdorin", - tha Spiropali.