SHBA, Palmer: Synimi ynë, hapja e negociatave të Shqipërisë me BE- në
Kriza politike, zyrtari i DASH vjen në Tiranë, takime edhe me liderin e opozitës Ndikimi i SHBA, tri objektivat amerikane në rajon
VIZITA
Drejtori për Europën Qendrore dhe Jugore në Departamentin e Shtetit, David Kostelancik, viziton Tiranën, ku do të takohet me përfaqësues të forcave politike në Shqipëri. Diplomati amerikan do të zhvillojë një takim me kryetarin e Partisë Demokratike, Lulzim Basha, këtë të enjte. Por, ka pak të dhëna mbi axhendën e takimeve të tjera të tij në kryeqytetin shqiptar.
Shtetet e Bashkuara të Amerikës nisin për pjekjet për zgjidhjen e krizës politike në Shqipëri. Pas emërimit të Matthew Palmer si përfaqësues i posaçëm për rajonin, një tjetër zyrtar amerikan duket se është angazhuar për situatën në vendin tonë. Drejtori për Ballkanin në Departamentin e Shtetit, David Kostelancik, të enjten do të ndalet në Tiranë, në një takim me liderët politik, përfshirë kryetarin e opozitës, Lulzim Basha. Në një kohë kur kriza politike në vendin tonë është thelluar, duket se Shtetet e Bashkuara të Amerikës kanë shtuar vëmendjen drejt Shqipërisë. Kjo axhendë ende e pabërë publike e zyrtarit të lartë amerikan vjen vetëm pak ditë pas emërimit të Matthew Palmer si përfaqësues i posaçëm për rajonin. Kostelancik është një diplomat karriere, ndërsa e njeh mirë realitetin politik dhe social në Shqipëri, për faktin se më herët ka qenë pjesë e stafit të ambasadës amerikane në Tiranë. Deri pak muaj më parë, ai ka qenë zëvendësambasador i SHBA- ve në Hungari. Gjithashtu ka mbuluar në Departamentin e Shtetit marrëdhëniet me Rusinë. Por krahas amerikanëve, kriza politike duket se ka venë në lëvizje edhe gjermanët. Pritet që në mes të shtatorit, një delegacion i Bundestagut të ndalet në takime intensive në Tiranë. Në fokus pritet të kenë jo vetëm krizën politike, por dhe çështjen e statusit të vendit kandidat, për të cilin Këshilli Europian do të shprehet në tetor. Vizita e drejtorit për Europën Qendrore dhe Jugore në Departamentin Amerikan vjen teksa Shqipëria përjeton një krizë politike dhe një përplasje të fortë institucionale mes presidentit dhe qeverisë.
DEKLARATA
SHBA- të mbështesin integrimin e Shqipërisë në BE. Në Forumin Strategjik i Bledit, ( Slloveni), i ngarkuari i posaçëm i SHBA- të për Ballkanin Perëndimor, Matthew Palmer, shprehu mbështetjen e plotë të SHBA- ve për çeljen e negociatave të Shqipërisë dhe Maqedonisë së Veriut me BE- në. Palmer në fjalën e tij në Forumin me temë "Ballkani Perëndimor - Evropianizimi, Demokratizimi" theksoi se synimet e SHBAve për Ballkanin janë të qarta dhe janë tri: "Të mundësojë hapjen e negociatave për Shqipërinë dhe Maqedoninë e Veriut. Të mundësoje dialogun Serbi- Kosovë dhe gjetjen e zgjidhjeve për
problematikat kryesore. Bosnja dhe Hercegovina të bëhet një shtet funksional". Palmer tha se Shtetet e Bashkuara synojnë të "konkurrojnë në nivelin e një ndikimi pozitiv në rajon dhe ta përdorin atë ndikim për të lehtësuar integrimin evropian dhe euroatlantik të vendeve të Ballkanit Perëndimor". Palmer njoftoi se ai dëshironte të "ishte i pranishëm dhe të mbështesë përpjekjet e rajonit në arritjen
e qëllimeve të tyre". Ndër objektivat në fjalë, Palmer theksoi hapjen e negociatave për Shqipërinë dhe Maqedoninë e Veriut me BE
në, "në kushtet ideale në tetor". Departamenti i Shtetit pak ditë më parë emëroi Zëvendësndihmës Sekretarin Matthew Palmer si Për
faqësuesin e tij të Posaçëm për Ballkanin Perëndimor. "Në këtë rol, - tha Departamenti i Shtetit, - zoti Palmer do të udhëheqë përpjekjet tona për të forcuar angazhimin diplomatik amerikan në mbështetje të paqes, stabilitetit dhe begatisë në rajon dhe për t'u përqendruar në integrimin e vendeve të Ballkanit Perëndimor në institucionet perëndimore", - thuhej në njoftimin e DASH.