Mbyllet emisioni? Ermal Mamaqi flet për herë të parë për largimin nga “Klani”
Edhe pse kishte ditë që përmendej lartë e poshtë, më në fund Ermal Mamaqi konfirmon largimin nga TV “Klan”. Përmes një postimi emocional në “Instagram”, moderatori shprehet se do të fokusohet te kinematografia dhe marketingu, të paktën deri në janar. “Xing me Ermalin” nuk do të rikthehet këtë sezon televiziv as në TV “Klan”, as tjetërkund.
Nga janari e tutje, Mamaqi mund të rikthehet me një format të ri, të cilin po e zhvillon momentalisht, teksa po xhiron “I love Tropoja”.
“Miq, ju jam mirënjohës për mesazhet e shumta që më dërgoni në lidhje me ‘ Xing me
Ermalin’. E ardhmja jonë ndërtohet në momentet kur ne marrim vendimet. Dhe vendimet më të rëndësishme dhe që të çojnë përpara janë ato që të nxjerrin nga zona e rehatisë. Kam marrë vendimin të bëj një pauzë të shkurtër në punën time si moderator. Si rrjedhojë, ‘ Xing me Ermalin’ nuk do të jetë, të paktën deri në janar në programet televizive. Karriera ime do të zhvendoset në industrinë e kinematografisë dhe marketingut në këtë momente. Në të njëjtën kohë, bashkë me ekipin krijues të ‘ Xing. al’ po ndërtojmë një format të ri emisioni, që me shumë mundësi vjen në muajin janar në televizion. Një falënderim të madh kam për regjisoren Lorena Basha, skenaristët Besnik Mustafaj dhe Klaudia Brahimaj, për Olimpian dhe bandën e ‘ Xingut’, montazhierët Vini dhe Pavjoli, Kejvinën dhe Belindën, si dhe për të gjithë stafin e palodhur dhe të çmendur të ‘ Xing me Ermalin’. Mirënjohje televizionit kampion TV ‘ Klan’ për kushtet dhe për dashurinë e treguar në këto tri vite. Ndërkohë miq, ju pres në surpriza të reja që do t’ju mekin. Se siç thotë dhe miku im Will Smith, ‘ në jetë nuk ka rëndësi sa herë merr frymë. Momentet që të lënë pa frymë janë ato që e bëjnë jetën t’ia vlejë’. Ju përqaputh të gjithëve”.