Rama takon Merkel, negociatat për integrimin në fund të shtatorit
Kryeministri: Moment pozitiv, por të mos marrim mësysh veten duke u gëzuar "Nuk duam dhuratë, por atë që na takon"
Kryeministri Edi Rama u përpoq për herë të dytë brenda një viti që t'i mbushë mendjen kancelares Angela Merkel dhe Bundestagut se Shqipëria ka plotësuar kushtet dhe meriton që t'i hapen negociatat në muajin e ardhshëm. Kreu i qeverisë shqiptare i shoqëruar edhe nga ministri i Jashtëm në detyrë, Gent Cakaj, zhvilluan dje në Berlin një sërë takimesh që nisën me kancelaren Merkel dhe që vijuan më pas edhe me takime me deputetë gjerman të Komisionit të Bundestagut për Çështje të Bashkimit Evropian, ku u përpoqën që të marrin një "Po" të shtetit më të rëndësishëm europian për çeljen e negociatave të anëtarësimit të Shqipërisë në Bashkimin Europian këtë vjeshtë. Por ndërsa vendimi përfundimtar i takon Bundestagut që do të diskutojë për këtë çështje në 27 shtator, duket se Rama ka mundur të marrë një pëlqim paraprak të Kancelares në takimin që zgjati afro 30 minuta dhe ku ai i dhuroi edhe një kopje të librit të tij më të fundit me piktura që do të prezantohet në Berlin në 15 shtator. "Shumë i inkurajuar nga vlerësimet dhe predispozita pozitive ndaj Shqipërisë e Kancelares Merkel. Një mike e vërtetë", - shkroi Rama shkurt fill pas takimit që pati në kancelarinë gjermane. Ndërkohë që vetë Kancelarja Merkel do të postonte në profilin e saj në rrjetet sociale një foto nga momenti i dhurimit të librit, duke e quajtur Ramën një politikan artist. "Kancelarja Merkel mirëpret Edi Ramën, kryeministër i Shqipërisë. Politikani është, gjithashtu, një artist dhe i solli Kancelares librin e tij të fundit si një suvenir", - shkruhej në faqen e Kancelares Merkel. Por pak minuta më vonë vetë zyra e Kancelares bëri një njoftim të shkurtër lidhur me këto takime, ku konfirmoi se Gjermania mbështet pranimin e Shqipërisë në BE. "Gjermania mbështeti pranimin e Shqipërisë në NATO në 2009, dhe mbështet pranimin e shtetit të Ballkanit në Bashkimin Evropian. Gjatë Konferencës së Ballkanit Perëndimor në Posen, më 5 korrik 2019, Kancelarja pranoi se pavarësisht vazhdimit të vështirësive politike, kishte përparim të rëndësishëm në të gjithë rajonin", - thuhet në reagimin e kancelarisë gjermane. Ajo gjithashtu thekson se Gjermania shpreh gatishmërinë e
plotë për të ruajtur kushtetutën dhe zhvillimin e demokracisë në vendin tonë. "Gjermania ka një interes të fortë për të kontribuar në kushte të qëndrueshme, demokratike dhe kushtetuese në Shqipëri duke mbështetur procesin e transformimit të saj", - theksohet ndër të tjera në njoftimin e shpërndarë nga zyra e shtypi të Kancelares Angela Merkel. Ndërkohë që vet kryeministri Edi Rama do të konfirmonte pas takimeve edhe në Bundestag, përfshi edhe kryetarin e tij, Wolfgang Schäuble, se vlerësimet që kishte marrë në këto takime ishin inkurajuese. "Kancelarja pati vlerësime shumë inkurajuese pozitive
dhe ajo që është më e rëndësishme, një predispozitë shumë pozitive për ta çuar përpara këtë proces dhe për të arritur në një përfundim pozitiv, që do të thotë një mbështetje e Gjermanisë për atë çka të gjithë dëshirojmë", - tha Rama. Gjithsesi ai shtoi se vendimi përfundimtar i takon grupeve parlamentare dhe Bundestagut. "Grupet janë grupe demokratike, kanë ide të ndryshme, kanë qasje të ndryshme, kështu që me shumë durim, ne do të vazhdojmë kontaktet dhe kjo është faza kur do të bëjmë çmos që, pavarësisht gjithë pengesave që ja kemi krijuar vetes në gjysmën e parë të këtij viti sidomos, t'ia dalim që të hyjmë në një fazë të re,
krejt tjetër, të rrugës sonë europiane. Ne po punojmë intensivisht për aq sa mund të bëjmë", - shtoi Rama duke theksuar, gjithashtu, se ky vendim nuk varet vetëm nga Shqipëria, por edhe nga vendet anëtare. Kryeministri u shpreh optimist për qëndrimin e Gjermanisë, ndërsa theksoi se një përgjigje pozitive nuk do ishte dhuratë për Shqipërinë. "Jemi në një moment që atmosfera është pozitive, por duhet që të përpiqemi deri në fund dhe të përpiqemi, le të themi, që të mos marrim më sysh veten, duke u gëzuar, apo folur para kohe. Sigurisht që nuk bëhet fjalë për një dhuratë, bëhet fjalë për të marrë atë që na takon", - tha Rama.