Krichbaum: Procesi për Shqipërinë dhe Maqedoninë mund të ndahet
Parlamentari
gjerman kristiandemokrat, Günter Krichbaum nuk përjashton mundësinë që Maqedoni e Veriut dhe Shqipëri të ecin në dy rrugë të ndara sa i përket procesit të integrimit. Në një intervistë për Deutche Welle, deputeti gjerman theksoi se secili shtet duhet të vlerësohet sipas meritës dhe ndaj e sheh si të mundshme që procesi integrimit të ndahet për dy shtetet ballkanike fqinje. "Siç thashë ne Bundestagu gjerman jemi duke u këshilluar edhe për Shqipërinë. Sa i përket pyetjes për ndarje mund të them se që prej raundit të fundit të zgjerimit të BE, me 10 plus 2 shtete, më 2004 dhe 2007 është parë se është më mirë që vendet të vlerësohen sipas përparimeve që bëjnë vetë, me të ashtuquajturën "principle of own merit". Prandaj vendet duhen gjykuar për përpjekjet që bëjnë. Për mua është e qartë se mund të bëhet shkëputja e dy vendeve, e megjithatë në fund mund të ndodhë që bisedimet të fillojnë në të njëjtën kohë për të dy vendet. Nuk po flasim për fillimin e bisedimeve për kapitujt e pranimit, se ky është hapi i dytë. Ky ' principle of own merit', është një princip i BE dhe secili vend vlerësohet për sukseset e veta", - tha Günter Krichbaum. Ndërkohë që ai ka veçuar në vlerësimin e vet, pozitën e favorshme në të cilën ndodhet Maqedonia në këtë proces. "Unë mendoj se përpjekjet që po bën Maqedonia Veriore vlerësohen, sepse me Marrëveshjen e Prespës u arrit të zgjidhet një konflikt shumë vjeçar me Greqinë. Ky sukses vlerësohet. Por nuk duhet harruar që vazhdojnë të ekzistojnë sfida të mëdha përpara, si për shembull reforma e sistemit të drejtësisë, ose që ekonomia duhet të zhvillohet në mënyrë që të tërheqë investimet direkte. Dhe shumë fusha të tjera duhen zhvilluar sipër shembull liria e shtypit dhe gazetaria. Të gjitha këto janë fusha që dihen, dhe ku priten përparime. Ne nuk po flasim për pranim në BE këtë vit, por po flasim për fillimin e bisedimeve të pranimit. Ky do të jetë një proces i gjatë, ku duhet patur shumë durim", - tha ai.