Takimi, DW: Gjermania një "Po" me kushte për Shqipërinë

Media

gjermane Deutsche Welle ka pasqyruar me detaje vizitën e Ramës në Berlin, ndërsa ka paralajmëruar për një "Po" me kushte të Gjermanisë lidhur me vendimin për hapjen e negociatave në mes të tetorit. Ajo i referohet takimit të Ramës dhe Cakajt në Komisionin e Bundestagut për Çështje të Bashkimit Evropian ku sipas saj, kryeministri shqiptar, iu përgjigj pyetjeve të deputetëve gjermanë për sfidat që rezultojnë nga vërejtjet e progresraportit. Për shumë deputetë të CDU/ CSU- së shmangja e disa prej këtyre mangësive janë kushte, për çeljen e kapitujve të negociatave. Ato kanë të bëjnë me ndërtimin e një gjyqësori të pavarur, përpjekjet në luftën kundër korrupsionit dhe të krimit të organizuar, sidomos atij të drogës dhe realizimi i reformës zgjedhore. Ky ishte konsultimi i fundit i deputetëve në Bundestag, para se të krijonin opinionin për Shqipërinë, të cilin, sipas të gjitha gjasave do ta hedhin në votë në datën 27 shtator. Ajo raporti se socialdemokratët dhe të gjelbrit, të cilët e kanë shprehur qysh herët qëndrimin e tyre pro çeljes së negociatave, ky dëgjim nuk solli ndonjë ndryshim në opinion. Deputeti socialdemokrat Christian Petry, i tha Deutsche Welles, se partia e tij është duke finalizuar kompromisin me kristiandemokratët dhe kristiansocialët. Sipas Petryt "po shtohen gjasat që në datat 26 ose 27 shtator të votojmë për një "Po, me kushte". DW mëson nga qarqet e CDU/ CSU- së se dëshira e Kancelares Angela Merkel është që Shqipëria dhe Maqedonia e Veriut të hyjnë së toku në procesin çeljes së negociatave. "Shanset duken të mira që Kancelarja kësaj radhe t'ua mbushë mendjen edhe kolegëve më skeptikë të saj që ta shohin Shqipërinë me sy më pozitiv dhe të japin "po"- në e premtuar qysh në qershorin e vitit 2018", - shkruan DW.