Agim Kola në pranga, administrator i "R. S. M& Hidro" dhe jo i "ANK"- së
Kompania ANK: Kanë emër të njëjtë, po s'kemi lidhje me Agim Kolën e ' R. S. M& Hidro Company' I arrestuar nuk është administratori i koncensionit të rrugës Milot- Balldren
Në kuadër të luftës kundër informalitetit, policia e sh tetit ka arrestuar dy ditë më parë një tjetër biznesmen. Në pranga ka rënë administratori i kompanisë "R. S M& Hidro Company", Agim Kola, i cili është i 17- ti në pranga në kuadër të këtij operacioni.
Dje, "Gazeta Shqiptare" publikoi gabimisht lajmin se në pranga kishte rënë administratori i koncensionit Milot- Balldren, por ky është një lajm i pavërtetë. Administratori i kompanisë së koncensionit Milot- Balldren ka të njëjtin emër, Agim Kola, por nuk ka lidhje me biznesmenin tjetër Agim Kola që u arrestua nga policia.
Në vijim, "Gazeta Shqiptare" publikon edhe reagimin e plotë të kompanisë "ANK" e cila ka sqaruar në një deklaratë të gjitha mediat se lajmi i arrestimit të administratorit është i pavërtetë dhe se ai nuk ka pasur kurrë ndonjë kallzim apo vendim penal për ndonjë veprimtari të kundraligjshme.
DEKLARATA E PLOTE
Në datën 13.09.2019 dhe në datë 12.9.2019, në versionin e shtypur por edhe në atë online të gazetës, është publikuar lajmi: "Skandali/ Kuvendi i dha koncensionin për Milot- Balldren, pronari i firmës arrestohet nga Policia". Në cilësinë e administratorit të shoqërisë "ANK" sh. p. k., ju informoj se:
Në titull dhe përmbajtje të tij, ky "lajm mediatik", është tërësisht i pavërtetë dhe si i tillë cënon rëndë nderin, dinjitetin imazhin dhe reputacionin e z. Agim Kola dhe të shoqërisë "ANK" sh. p. k.
Nuk është aspak e vërtetë që administratori i shoqërisë "ANK", z. Agim Kola është arrestuar nga policia. Ky është një fakt lehtësisht i verifikueshëm. "Lajmi" i publikuar nga gazeta juaj është një shpifje dhe bazuar në nenin 120 të K. Penal parashikohet shprehimisht se: "Përhapja e qëllimshme e thënieve, si dhe çdo informacioni tjetër, duke e ditur se janë të rreme, që cenojnë nderin dhe dinjitetin e personit, përbën kundërvajtje penale dhe dënohet me gjobë nga pesëdhjetë mijë gjer në një milion e pesëdhjetë mijë lekë.
Po kjo vepër, kur kryhet botërisht, në dëm të disa personave ose më shumë se një herë, përbën kundërvajtje penale dhe dënohet me gjobë nga pesëdhjetë mijë gjer në tre milionë lekë."
Do të donim ta konsideronim këtë lajm një lajthitje apo pakujdesi të gazetarit autor i shkrimit, dhe jo një linjë editoriale e gazetës Tuaj, që në fakt ka për detyrë të verifikojë informacionin përpara botimit, të sigurohet që lajmi apo informacioni është i saktë dhe i bazuar në fakte.
Theksojmë se Administratori i shoqërisë "ANK", sh. p. k., pavarësisht se ka të njëjtin emër nuk ka asnjë lidhje me administratorin e shoqërisë R. S. M& Hidro Company, i cili është arrestuar për evasion fiskal. Ju sigurojmë se z. Agim Kola, në cilësinë e administratorit të shoqërisë "ANK" sh. p. k, por edhe vetë kjo shoqëri, gjatë veprimtarisë së tij respekton ligjet dhe aktet nënligjore gjatë ushtrimit të veprimatrisë të shoqërisë dhe ka paguar të gjitha detyrimet e përcaktuara sipas legjislacionit në fuqi. Në këtë kontekst, Ju sigurojmë se nuk ka asnjë kallzim penal apo vendim penal në emër të tij për kryerjen e veprimeve të kundraligjshme.
Sipas praktikës juridike, Mediat luajnë rol të rëndësishëm në shoqërinë demokratike. Edhe pse nuk duhet t'i kalojnë disa kufi, posaçërisht kur kemi të bëjmë me reputacionin dhe të drejtat e të tjerëve, detyra e tyre është që të ofrojnë informata dhe ide në përputhje me obligimet dhe përgjegjësitë e tyre lidhur me të gjitha çështjet e interesit publik. Mediat jo vetëm që kanë rolin e ofrimit të informatave dhe ideve të tilla, por edhe qytetarët kanë të drejtë që t'i marrin ato. Po të ishte ndryshe, mediat nuk do të mund të luanin rolin e tyre jetik të "kontrolluesit publik".
Bazuar në sa më sipër, në shërbim të interesit publik, në mbështetje të legjislacionit në fuqi dhe të parimit bazë të gazetarisë mbi informimin e fakteve apo lajmeve të vërteta, në kushtet kur "lajmi" i publikuar nga Ju është tërësisht i pavërtetë, kërkojmë përgënjeshtrimin e menjëhershëm të lajmit, në të njëjtin format dhe renditje me publikimn e "lajmit" të pavërtetë të datës 13.09.2019. Në rast të kundërt ju bëjmë me dije se do të vijojmë rrugën ligjore për rivendosjen në vend të, dinjitetit, imazhit dhe reputacionin e administratorit dhe të shoqërisë "ANK" sh. p. k. Kërkojmë gjithashtu nga gazeta Juaj verifikimin më parë të çdo lajmit që ka lidhje me shoqërinë ANK, përpara botimit të tij.
Të sigurt në një reflektim Tuajin, ADMINISTRATORI
AGIM KOLA