Antiinformaliteti mbushi arkën - U mblodhën 2.3 mld lekë më shumë në gusht
Në
8 muajt e parë të vitit, në buxhetin e shtetit, kanë hyrë rreth 305.9 miliardë lekë, dhe duket se fushata anti- informalitet ka kontribuuar me 2.3 miliardë lekë më shumë. Kështu, nga 37.8 miliardë lekë që janë mbledhur në gusht 2018, gjatë muajit që lamë pas u mblodhën 40, 1 miliard lekë, ndërsa korriku nuk ishte një muaj i frytshëm në këtë drejtim. Sipas treguesve fiskalë të Ministrisë së Financave dhe Ekonomisë, po të analizojmë të ardhurat e nga tatimet dhe doganat, gjatë periudhës korrikgusht që korrespondon me aksionin antiinformalitet, vihet re se në muajin gusht janë mbledhur 28.8 miliardë lekë, me një rritje të konsiderueshme ndaj muajit Korrik, ku u mblodhën 26.5 miliardë lekë, dhe në total të ardhurat nga ky zë janë regjistruar në 205.8 miliardë lekë për 8mujorin 2019, apo 6.3 miliardë lekë më shumë se një vit më parë. Me gjithë rritjen e të ardhurave, duket se për të 8 muaj radhazi, luhatjet në kursin e këmbimit vijojnë të japin goditje buxhet, pasi të ardhurat nga TVSH kanë rënë me 2.9 miliardë lekë krahasuar me 8 muajt e parë të 2018ës, duke u regjistruar në rreth 90.4 miliardë lekë. Përpos efekte të kursit të këmbimit, mos mbledhja e TVSH tregon edhe tkurrjen e konsumit dhe dinamizmin e dobët të ekonomisë. Po ashtu, negativisht kanë kontribuuar taksat nacionale, ku janë mbledhur rreth 2 miliardë lekë më pak se 2018- ta dhe në total 23.6 miliardë lekë. Performancë pozitive ka pasur mbledhja e tatimit mbi fitimin, me rreth 2.9 miliardë lekë, ku janë mbledhur rreth 24.6 miliardë lekë. Ndërsa rritjen më të madhe e ka shënuar tatimi mbi të ardhurat personale, ku janë mbledhur 31.6 miliardë lekë nga apo 6 miliardë lekë më shumë se viti i kaluar. Dhe ashtu sikurse pritej, të ardhurat nga akciza janë rritur me 1.4 mld lekë në raport me Gusht 2018. Sa i takon investimeve, janë disbursuar 38 miliardë lekë, apo rreth 1.6 miliardë më pak se viti që lamë pas.