Negociatat, Zingraf: Po bisedojmë me vendet skeptike për të thënë "Po"

Gjermania

është e gatshme që të jap ndihmesën e saj për reformën zgjedhore, por jo të marrë përsipër të mbikëqyrë dhe të monitorojë punën e komisionit të reformës zgjedhore ashtu sikurse kërkon opozita. Duke folur nga Lezha, ambasadori gjerman Peter Zingraf tha se kjo është detyrë e politikës dhe institucioneve shqiptare. "Unë mendoj se kjo është një detyrë e institucioneve shqiptare dhe e partive politike shqiptare, sepse në pikëpamjen time ne nuk mund të mbikëqyrim këtë proces. Sigurisht, ne mund të bëjmë thirrje në mënyrë të vazhdueshme sikurse mund të japim mbështetjen tonë teknike për formësimin e reformës zgjedhore. Madje, kemi paraqitur propozimet tona nga ekspertët gjermanë në formën e projektligjeve përkatëse. Pra, sikurse e thashë mbështetje dhe asistencë teknike me shumë kënaqësi, por sa i përket mbikëqyrjes dhe monitorimit ndërkombëtar nuk është detyra jonë", - theksoi ai. Ndërkohë që ai thekson se klasa politike shqiptare dhe institucionet shtetërore kanë afat deri në 6 muaj që të përmbushin kushtet që i janë vënë nga Bundestagu për çeljen e negociatave. "Unë mendoj pozitivisht lidhur me këtë. Pasi nuk ka një moment fiks për konferencën e parë të anëtarësimit, mendoj që një afat realisht do të ishte 6 muaj nëse do të shikonim në të shkuarën e proceseve të integrimit. Brenda këtij afati mund të arrihet në gjera të rëndësishme të themi zënia e pozicioneve në gjykata është në rrugë të mirë edhe reforma zgjedhore nëse do të arrije të eci mbarë besoj se do të jenë premisa të mira për të ecur më tej", - tha Zingraf. Ai u pyet edhe për hapjen e negociatave dhe nëse Shqipëria rrezikon të ndahet nga Maqedonia e Veriut, duke nënvizuar se Gjermania është angazhuar të bindë edhe vendet skeptike. "Sikurse e dini, qeveria federale, Bundestagu gjerman kanë thënë "Po" për nisjen e negociatave të anëtarësimit me Shqipërinë dhe sigurisht ne kemi patur bisedime në mënyrë të vazhdueshme lidhur me faktorët brenda Unionit që të mbërrihet në një vendim të tillë edhe me ato vende skeptike. Jo të gjithë vendet janë për "Po". Edhe brenda Bundestagut gjerman ka pasur grupime të vogla që kanë qenë kundër hapjes së negociatave, por në fund patëm një shumicë, e cila e tha "Po"- në e saj. Në këtë mënyrë, shpresojmë të arrihet tek një "Po" edhe nga vendet e tjera",- shtoi ai.