Drejtuesja e Krimeve të Rënda, letër KLP: Më caktoni në Prokurorinë e Përgjithshme

TIRANË - Donika Prela i është drejtuar përmes një shkrese Këshillit të Lartë të Prokurorisë, përmes së cilës kërkon caktimin e saj në Prokurorinë e Apelit në Tiranë ose në Prokurorinë e Përgjithshme. Kjo për faktin se me krijimin e Prokurorisë së Posaçme Kundër Korrupsionit dhe Krimit të Organizuar ose ndryshe SPAK, institucioni i krimeve të Rënda shkrihet dhe shumë prokurorë, mes tyre dhe Prela, ose duhet të rikthehen në detyrat e tyre të mëparshme, ose do të do të emërohen në rrethe të ndryshme sipas nevojave të institucioneve. Në rastin e Donika Prelës, për faktin se ajo është përjashtuar nga gara për në SPAK, atëherë sipas ligjit duhet të rikthehet për të vijuar ushtrimin e detyrës në institucionin ku ka emërimin, pra në prokurorinë e Durrësit. E ndërsa pritet që Këshilli i Lartë i Prokurorisë brenda tetorit të marrë vendim për krijimin e SPAK, Prela, i ka paraprirë situatës, pasi me datë 2 tetor depozitoi kërkesën pranë qeverisë së prokurorëve, duke kërkuar transferimin në një detyrë më te lartë. Sepse sikurse thanë burimet pranë këshillit ajo kërkon të shkojë prokurorinë e Apelit dhe nëse është e mundur edhe në Prokurorinë e Përgjithshme, institucion që drejtohet përkohësisht nga mikja e saj e besuar, Arta Marku. Zyrtarisht "qeveria e prokurorëve" tha se kërkesa i është dërguar për shqyrtim Komisionit të Karrierës dhe pasi të njihet me relacionin e përgatitur prej tij, do të vendosë nëse do ta caktojë përkohësisht Donika Prelën në Apel apo Prokurori të Përgjithshme. Në fakt ligji, parashikon që Këshilli i Lartë i Prokurorisë mund të bëjë caktime të përkohshme të prokurorëve, apo drejtuesve të prokurorive, por për këtë vendos sipas nevoja që paraqet secili institucion. Në asnjë rast, caktimet e përkohshme, nuk bëhen me kërkesën e prokurorit. Ndaj qëndrimi që do të mbajë këshilli në rastin e Donika Prelës, do të dëshmojë sesa i paanshëm dhe i pandikuar është institucioni kyç i krijuar në kuadër të reformës në drejtësi, për të qeverisur prokurorët.