Fakulteti i Shkencave, protestë për Kopshtin Botanik: Të mos e marrë Bashkia
Shtyhet seanca gjyqësore për shqyrtimin e padisë
Pas vendimit të 17 qer shorit ku qeveria ven dosi që të kalojë Kopshtin Botanik në pronësi të Bashkisë Tiranës, ( ishte në pronësi të shtetit), stafi pedagogjik dhe studentë të Universitetit të Tiranës kanë shkuar dje para Gjykatës Administrative ku protestuan për rikthimin e statusit. Ndonëse dje ishte përcaktuar që të mbahej seanca në Administrative, ku do të shqyrtohej padia e Universitetit të Tiranës ndaj vendimit, ajo është shtyrë për në datën 29 tetor. Kujtojmë se pas vendimit, reagoi rektori i UT- së Mynyr Koni, i cili theksoi se VKM- ja në fjalë ishte në shkelje të plotë, ndërsa paralajmëroi se do të vazhdonte beteja ligjore. Kopshti Botanik, është krijuar, menaxhuar prej kohësh nga Fakulteti i Shkencave të Natyrës. Ai shfrytëzohet nga studentët, por jo vetëm, për mësimdhënie, për kurrikulat, pasi në këtë kopsht janë mbjellë 1400 lloj bimësh. Pedagogët dhe studentët e pranishëm para gjykatës Administrative kanë kërkuar njëzëri se Kopshti Botanik të qëndrojë në pronësi të universitetit. Ndërkohë dekani i Fakultetit të Shkencave të Natyrës, Spiro Dushku, ka folur në një lidhje telefonike për "News24" lidhur me situatën e krijuar te Gjykata Administrative e Tiranës, ku studentët dhe pedagogët u mblodhën në pritje të vendimit për Kopshtin Botanik, nëse do të rrëzohet ose jo vendimi i qeverisë për ta kaluar atë në pronësi të Bashkisë së Tiranës. Dekani Dushku tha se sapo ka përfunduar seanca e parë dëgjimore, në të cilën kanë munguar përfaqësuesit nga pala e akuzuar, përkatësisht Kryeministria dhe Ministria e Arsimit. "Sapo ka përfunduar seanca e parë dëgjimore, ku munguan përfaqësuesit kryesor nga pala e akuzuar, që janë ata të kryeministrisë dhe të Ministrisë së Arsimit. Ne nuk jemi këtu për të treguar se kush ka muskuj më shumë, por ne do ta mbrojmë Kopshtin Botanik. Nuk e konsideroj si luftë, por një shans për studentët, pa cenuar rëndësinë e këtij aseti, si një qendër e kërkimit shkencor. Ne do ta mbrojmë Kopshtin Botanik me rrugë ligjore",- u shpreh Dushku.
REAGIMI NGA BASHKIA E TIRANËS
Në një kohë kur Universiteti i Tiranës është shprehur kundër VKM- së së qeverisë për të kaluar Kopshtin Botanik në pronësi të Bashkisë së Tiranës, dje reagoi vetë kryebashkiaku Erion Veliaj. Ai deklaroi se Kopshti Botanik jo vetëm që nuk do i hiqet Universitetit, por do të transformohet nga një landfill mbetjesh, në një hapësirë të shfrytëzueshme për këdo. Gjatë takimit me vullnetarët për Maratonën e Tiranës, Veliaj theksoi se protestat për Botanikun po përdoren politikisht, duke filluar nga Jamarbër Malltezi dhe Rektori i Universitetit të Tiranës Mynyr Koni që kanë marrë urdhër politik për të bllokuar projektet. "Mbledhje e jashtëzakonshme e Jamarbër Malltezit, dhëndrit të Saliut. Po mblidhuni ndonjëherë për shkencë me të njëjtin pasion, me të njëjtin zell, me të njëjtin nerv, mblidhuni njëherë për të bërë shkencën për të cilin paguheni nga taksat e këtij vendi dhe pastaj mblidhuni për interesat tuaja, për pronat tuaja, për tenderët tuaja, për 5 mijë lekëshat e nuseve. Kështu që dua ta ndaj të qartë. Nuk i shkoj tjetrit në zyrë, i jap dorën për marrëveshje dhe kur më jep porosi partia dal dhe e kthej. Ishin në zyrën time, me dëshmitarë. Bëmë një marrëveshje në bisedë dhe ju thamë presim tani një draft. Kur vajtën të bënin draftin ju kishte ardhur urdhri i partisë, të shajmë Lali Erin, se po na merr Kopshtin Botanik",- tha Veliaj. Kreu i Bashkisë u shpreh se protestat bëhen pikërisht nga ata që kanë treguar se janë inkopetentë dhe kanë abuzuar me pronat e Kopshtit Botanik duke marrë edhe 5 mijë lekëshat e nuseve. "Më i marrë se sa është sot që është pronë e askujt dhe që është një landfill ferash, çfarë mund t'i marrësh më shumë?! E vetmja gjë që mund të bëjmë është ta bëjmë më mirë, por më keq, nuk e bën dot njeri, siç është sot. PD e mori gjysmën e bëri asfalt dhe beton, Mynyri mori 5 mijë lekëshat e nuseve dhe për këtë mbledh senatin. Po i kishte Mynyri kartat studentore pse s'i bëri? Nuk vuajnë këta që s'kanë kompetenca, këta vuajnë që janë inkompetentë. Kompetenca kanë, por janë inkopetentë. 98 ndërtime pa leje ku sot dalin me vrap. Këta që iu dhimbset gjëja publike. Kështu që për të gjithë ata që bëjnë shkencë dhe që nuk janë pjesë e pazareve të 5 mijë lekëshave të nuseve, dhe të tenderëve të rojeve të Mynyrit, unë ju garantoj sot që jo vetëm që do të keni mundësi të bëni shkencë, por do keni më shumë akses dhe do keni edhe më shumë financim", theksoi Veliaj. Edhe nënkryetari i Bashkisë së Tiranës, Arbian Mazniku, në një lidhje telefonike për ' News24' deklaroi se Bashkia do shtojë investimet tek Kopshti Botanik, ku përveç Fakultetit të Shkencave të Natyrës, ai të jetë i hapur edhe për qytetarët. "Prej shumë kohësh, përmes një bashkëpunimi mes bashkisë së Tiranës dhe universitetit, kemi diskutuar që të kemi një Kopsht Botanik që t'i duhet studenteve, për funksione akademike, por që të shtojmë dhe funksionin që njerëzit ta vizitojnë atë. Sot nuk shkon dot të vizitosh Kopshtin Botanik, pasi është pa funksionin e mundshëm që ta shohin qytetarët. Ekziston mundësia që të ruhet gjithçka, por duke krijuar mundësinë që në orët që fakulteti nuk e ka në përdorim, t'u vihet në dispozicion qytetarëve, kur nuk ka mësim, të shtunën e të diel. Ai është për kërkime studimore, por duhet të jetë edhe për vizitorët. Shkojnë njerëzit dhe paguajnë një 5 mijë lekësh dhe futen e bëjnë foto. Një objekt që është në zemër të qytetit duhet të ketë një funksion më shumë, që të mos cenohet. Ne jemi të gatshëm për investime të përbashkët. Ne i kemi dërguar shkesa të vazhdueshme universitetit. Në momentet e para kemi marrë në opinion pozitiv për bashkëpunim. Më pas jo. Shpresoj që mos të jenë për shtytje politike, pasi u vendosën në anën tjetër. Ky projekt shton dobinë për qytetin",- tha ai.