Zgjedhjet, "Venecia": Meta tejkaloi kufijtë, por s'mund të shkarkohet

"Për shtyrjen e zgjedhjeve duhej konsensus, por shkeljet nuk justifikojnë hetimin" "Vendimi përfundimtar duhet të merret nga Kushtetuesja"

Komisioni i Venecias pas mbledhjes së fak teve dhe takimeve që zhvilloi në Tiranë, thërritur nga komisioni hetimor parlamentar ngritur për shkarkimin e Ilir Metës arriti në përfundimin se: "edhe nëse Presidenti i tejkaloi kompetencat, shkarkimi i Metës mund të mos jetë i justifikueshëm". Ky është opinioni final i Komisionit të Venecias që u mblodh këtë të premte e ku merrnin pjesë dhe përfaqësues të mazhorancës që e kërkuan këtë vlerësim si dhe përfaqësuesit e Presidentit. "Edhe nëse Presidenti mund të ketë tejkaluar kompetencat me shtyrjen e zgjedhjeve lokale, shkarkimi mund të mos justifikohet. Edhe nëse Presidenti Ilir Meta tejkaloi kufijtë, nuk mund të fajësohet. Shkeljet e kreut të shtetit shqiptar s'mund të justifikojnë hetimin. Zgjedhjet i shtyn parlamenti. Edhe nëse parlamenti e shpall fajtor, vendos Gjykata Kushtetuese",- thuhet në komunikatë. "Në sfondin e një procedure aktuale të fajësimit kundër Presidentit shqiptar Ilir Meta, për shtyrjen e zgjedhjeve lokale përtej mandatit zgjedhor të autoriteteve lokale, ekspertët kushtetues të Këshillit të Evropës të Komisionit të Venecias konkludojnë Presidenti mund të ketë vepruar përtej kompetencave të tij kushtetuese",thuhet në njoftimin e Komisionit të Venecias.

KONSENSUSI

Dokumenti i plotë i Komisionit të Venecias do të bëhet publik të hënën e 14 tetorit. Në njoftim e djeshëm për shtyp të këtij institucioni thuhet se ekspertët e Venecias vlerësojnë se kreu i shtetit shqiptar nuk mund ta ndërmerrte këtë hap pa marrë më parë konsesusin e palëve politike. "Komisioni i Venecias vëren se Presidenti shqiptar nuk mund të anulojë zgjedhjet pa konsensus politik. Edhe në rast të gjendjes së jashtëzakonshme, siç është lufta ose katastrofa natyrore, Parlamenti do të duhet të miratojë legjislacion ad hoc për të shtyrë zgjedhjet. Ekspertët nënvizojnë se thirrjet e Presidentit për dialog dhe pritshmëritë se shtyrja e zgjedhjeve mund të kishte kontribuar në një kompromis midis palëve, ata theksojnë mungesën e Gjykatës ku mund të ankimohej dekreti i presidenti", shprehet Komisioni i Venecias. Në opinion thuhet se Presidenti nuk mund të ndërhyjë duke shkelur të drejtën për t'u zgjedhur për të zgjedhur edhe nëse një forcë apo më shumë vendosin të mos marrin pjesë në zgjedhje. Edhe në vendimin final nënvizohet se fakti që disa parti tërhiqen me vullnetin e tyre nga zgjedhja, s'do të thotë ato t'i imponohen gjithë partive të tjera, pasi në këtë mënyrë, partive bojkotuese do t'u lihej në dorë t'i bllokonin zgjedhjet në çdo rast. Në njoftim gjithsesi thuhet se pavarësisht tejkalimit të kompetencave nga ana e Presidentin shkeljet e tij nuk janë të një natyre kaq serioze sa të mund çonte në hetimin, fajësimin dhe më pas shkarkimin e kreut të shtetit. Por që gjithsesi do të vendoset nga Gjykata Kushtetuese.

GJYKATA

Komunikata mbyllet duke theksuar se pavarësisht vendimit të Kuvendit për shkarkimin ose jo të Presidentit, vendimi përfundimtar duhet të merret nga Gjykata Kushtetuese. "Ekspertët nënvizojnë thirrjen e Presidentit për dialog dhe besimin se shtyrja e zgjedhje mund të kontribuonte në një kompromis midis partive. Ata theksojnë mungesën e sfidimit të dekreteve të Presidentit përpara një gjykate. Për më tepër, zgjedhjet lokale nuk kanë të njëjtin status kushtetues si zgjedhjet parlamentare. Ekspertët thonë se edhe nëse Kuvendi do të përcaktonte seriozitetin e shkeljeve, kjo nuk duhet domosdoshmërisht të çojë në shkarkim, duke marrë parasysh fuqinë e seancave plenare të Kuvendit për të marrë parasysh qëllimet e tjera kushtetuese, siç janë mbajtja e kontrolleve dhe ekuilibrave dhe stabiliteti në vend. Nëse Kuvendi do të vendoste në favor të shkarkimit, në fund do t'i takonte Gjykatës Kushtetuese, e cila aktualisht nuk funksionon, të konfirmojë nëse vendimet e Presidentit janë shkelje "serioze" që do të justifikonin shkarkimin e tij", thuhet në komunikatë. Në fund të njoftimit evidentohet fakti se vetëm opinioni final është versioni zyrtar i Komisionit të Venecias dhe jo drafti paraprak i bërë publik në media.