Integrimi në BE, Bushati në Kroaci: Të ndahet interesi kombëtar nga politika e ditës

Ish-

ministri i Punëve të Jashtme, Ditmir Bushati, ndodhet në forumin e përvitshëm "Cavtat" që mbahet në Durovnik të Kroacisë, ndërsa në të marrin pjesë parlamentarë të shumtë nga Bundestagu i Gjermanisë, Parlamenti Evropian si dhe ekspertë të ndryshëm nga Evropa Lindore. Me një postim në "Facebook", Bushati ndalet edhe te sfidat që ka sot Shqipëria për anëtarësim në familjen e madhe të Bashkimit Europian. Sipas tij, anëtarësimi në Evropë është e vetmja shpresë për vendin tonë, pasi përmes kësaj rruge do të fuqizohet demokracia dhe qytetarët do të kenë një mundësi më të mirë socioekonomike. Ai shfrytëzon rastin t'i bëjë thirrje politikës shqiptare, ku kërkon prej saj që të ndajë qartë interesin e epërm kombëtar nga politika e përditshme. "Teksa javës tjetër presim nga vendet anëtare të BE- së përcaktimin e datës për fillimin e bisedimeve të pranimit, në përputhje me konkluzionet e BE- së të qershorit 2018, është me rëndësi që qëndrimet skeptike e frenuese ndaj procesit të zgjerimit të mos ngadalësojnë motivin tonë për të vijuar me procesin e vështirë të reformave transformuese", shprehet z. Bushati. Ish- ministri përmend se: "Evropa, si projekt i shpresës është e vetmja rrugë për të fuqizuar demokracinë, për të projektuar një model të qëndrueshëm të zhvillimit ekonomik dhe progresit shoqëror. Kjo nuk është çështje kapitujsh e ligjesh në letër, por çështje e Shqipërisë së nesërme. Pavarësisht qëndrimit që mund të ketë sot Franca, nesër Holanda apo pasnesër një vend tjetër anëtar i BE, duhet të jemi të vetëdijshëm se rruga jonë do të jetë e përpjetë. Ndaj, na duhet një pakt për Evropën dhe angazhim i njëmendtë politik e shoqëror për të ndarë interesin e epërm kombëtar nga politika e ditës. Procesi i anëtarësimit në BE duhet të korrespondojë gjithnjë e më shumë me modernizimin, demokratizimin dhe zhvillimin e Shqipërisë së nesërme".