Anila Denaj: Shërbimet tek ADISA lehtësojnë procesin
Fiskalizimi drejt finalizimit, ministrja e Financave: Po vlerësojmë propozimet teknike Krijimi i agjencisë është koncept “one stop shop”
Kalimi i shërbimeve të tatimpaguesve pranë ADISA ofrohen më shumë lehtësi për qytetarët dhe ka qenë që në fillim të krijimit të tij si koncept “one stop shop”. Kjo është deklarata e ministres së Financave, Anila Denaj, në lidhje me shërbimet që ofron ADISA. “Këto janë shërbime publike që u mundësojnë qytetarëve për të qenë në një ‘ one stop shop’ dhe ADISA ka qenë që në fillim të krijimit të tij si koncept ‘ one stop shop’. Ky urdhër krijon të njëjtën mundësi të fleksibilitetit dhe të kohës së siguruar. Le të lejojmë edhe një herë në vëmendje të të gjithë qytetarëve nevojën e firmës dixhitale. Firma dixhitale do t’u mundësojë të gjithë qytetarëve që nëpërmjet shërbimeve që ata marrin sot në mënyrë elektronike të përfitojnë edhe kohë më të shkurtër përveç sporteleve të ADISA- s”, - tha Denaj. Dy ditë më parë, Partia Demokratike denoncoi bashkimin e shërbimeve, sidomos për pjesën e çështjeve tatimore tek ADISA, duke thënë se zgjatet koha për kthimin e një përgjigjeje te tatimpaguesi, duke dëmtuar më tepër klimën e biznesit në vend. Por qeveria mendon se klima përmirësohet pasi shkurtohet koha dhe po ashtu, mundësia për korrupsion.
FISKALIZIMI
Ministria e Financave dhe Ekonomisë po vijon normalisht punën për vënien në jetë të projektit të fiskalizimit në 1 janar 2020, ashtu sikurse është parashikuar. Ministrja Anila Denaj bën me dije se ka përfunduar faza e konsultimeve, e cila nisi në muajin korrik dhe tashmë po vlerësohen propozimet teknike. Sipas ministres Denaj, projekti i faturimit ‘ online’ ka në thelb përmirësimin e administrimit, pasi nuk eliminon tërësisht informalitetin. Ky projekt ka si qëllim të bëjë transparente marrëdhëniet biznes- konsumator përmes raportimit ‘ online’ të veprimeve brenda 24 orësh, marrëdhëniet biznes- biznes, si dhe marrëdhëniet qeveribiznes, përmes një aplikacioni të ri që çdo tatimpagues do ta ketë të detyrueshëm ta instalojë. Deklaratat u bënë dje pas aktiviteteve të zhvilluara me rastin e “Tetorit gjerman” nga ambasada gjermane në Tiranë. Ministrja ishte e pranishme në ceremoninë e çeljes së panairit të hapur për të prezantuar punën e GIZ në Shqipëri, tema e të cilit është “Talente dhe ide për të ardhmen e Shqipërisë”. Në fjalën e saj të rastit, ministrja Denaj vlerësoi bashkëpunimin mes Shqipërisë dhe Gjermanisë dhe shprehu mirënjohjen e saj për mbështetjen që qeveria gjermane i ka dhënë dhe i jep vendit tonë. “Ky bashkëpunim - tha znj. Denaj - është mbështetur në dy shtylla komplementare, bashkëpunimin financiar dhe bashkëpunimin teknik, ku mbështetja është dhënë në projekte të ndryshme në fushën e energjetikës, infrastrukturën sociale, por edhe në fusha të tjera të ekonomisë, si bujqësia apo turizmit. Janë më shumë se 1 miliard euro dhe pothuajse më shumë se 200 milionë asistencë teknike, të cilat përfshijnë të gjithë këto fusha që përmenda më lart. Fokusi i bashkëpunimit teknik i prezantuar edhe sot në këtë panair është mbështetja e shoqërisë shqiptare në rrugën e integrimit evropian dhe kjo është një perspektivë e dëshiruar nga të gjitha palët. Sigurisht bëhet me mbështetjen e të gjithë aktorëve dhe ju falënderoj shumë për temën e zgjedhur për këtë panair, ‘ Talente dhe ide për të ardhmen e Shqipërisë’, sepse në fakt ky panair i takon të rinjve dhe ata do ta çojnë përtej nesh të gjithë procesin e nisur”, u shpreh Denaj. Qeveria gjermane ka mbështetur me projekte të ndryshme zhvillimin e arsimit profesional në vendin tonë. Ministrja shprehu falënderimet e saj për këtë mbështetje dhe pohoi se në drejtim të arsimit profesional ka ende shumë për të bërë. Edhe pse sot ka 35 shkolla të arsimit profesional dhe një rritje të numrit të nxënësve që zgjedhin të arsimohen në këto shkolla, nga 14 mijë katër vite më parë, në gati 20 mijë këtë vit. Ministrja Denaj informoi se MFE është duke punuar mbi një strategji, e cila do të fokusohet në një përshtatje më të madhe të punësimit me arsimin profesional, si dhe për një qasje tjetër në dëgjimin e zërit të biznesit lidhur me arsimin profesional. “Investimi në shkollat profesionale është i larmishëm dhe ka nisur prej kohësh. Sot jemi të kënaqur që për katër vitet e fundit shohim një rritje të nxënësve në shkollat e arsimit profesional. Janë pothuajse 20 mijë që adresuan formimin e tyre në shkollat profesionale, nga 14 mijë që ishin katër vite më parë. Në këtë aspekt kemi punë për të bërë, si në aspekt të kurikulave, për të përmirësuar cilësinë e tyre dhe gjetjen e atyre cilësive profesionale që i vlejnë tregut të punës, por edhe infrastrukturës, në mënyrë që shkollat të jenë të përshtatshme dhe për arsimin dual, siç e përmendi z. ambasador, pasi kuptohet që në arsimin profesional vetëm teoria nuk mjafton, por gërshetimi i teorisë me praktikën është shumë i rëndësishëm dhe i mësuar ai paralelisht, në stilin gjerman, është apo aq i vyer, sepse e kanë treguar me vepra që është i duhuri”, u shpreh ministrja.