PS rezolutë në Kuvend kundër ndërhyrjeve të huaja dhe Fake News

Socialistët

do të paraqesin në Kuvend një projektrezolutë kundër ndërhyrjeve elektorale të huaja dhe Fake News. Lajmin e bën të ditur kryetari i Grupit Parlamentar të Partisë Socialiste Taulant Balla nëpërmjet një postimi në rrjetet sociale ku thekson se kjo nismë është e ngjashme me masat që po marrin vendet e Bashkimit Europian për të ndaluar ndërhyrjet e huaja në zgjedhje dhe nëpërmjet lajmeve të rreme. "Në ditët në vijim do të prezantojmë në Kuvendin e Shqipërisë një Rezolutë të përafruar me dokumentin që Parlamenti Europian miratoi këtë javë. Rezoluta e PE e miratuar të enjten më 10 Tetor 2019 ishte një dokument tepër i fortë "mbi ndërhyrjet e huaja elektorale dhe dezinformimin në proceset demokratike kombëtare dhe Europiane", - bëri të ditur Taulant Balla. Më tej ai thekson Paketa Antishpifje e miratuar nga Qeveria shqiptare dhe që pret miratimin në Kuvend është një hap i parë, i rëndësishëm për ta mbrojtur Shqipërinë nga dezinformimi. Një nga zgjidhjet që jep paketa konsiston në autorizimin e AMA, institucioni që mbikëqyr ofruesit e shërbimit të mediave audiovizive, të monitorojë tashmë edhe fushën e veprimit të të gjitha llojeve të mediave elektronike, duke përfshirë edhe publikimet online. "Qëllimi është i mirë: çdokush të marrë përgjegjësinë për fabrikimin apo shpërndarjen e lajmit të rremë. Duhet ta përmbyllim këtë fazë të parë të betejës me dezinformimin. Zgjidhja e ofruar në Paketën Antishpifje është e njëjtë me çfarë sugjeron BE "një përmirësim të Task- Force të BE- së StratCom në një strukturë të përhershme me një financim dukshëm më të mirë", - shprehet Balla. Kreu i grupit parlamentar të PSsë sjell në vëmendje se Shqipëria është bërë më parë prehë e ndërhyrjeve të jashtme në proceset elektorale nga Rusia. "Në fakt edhe Shqipëria regjistron një rast të rëndë të ndërhyrjes së huaj elektorale përmes financimit me burime nga kompani guaska, prapa të cilave ka prova se fshihet Rusia", - shkroi Balla.