Altman: Jemi ende të tronditur nga Andorra, Shqipëria është e fortë
Nëse
Shqipëria shkon drejt ndeshjes së radhës në eliminatoret e Europianit e zhgënjyer, por me shumë optimizëm për paraqitjen ndaj Turqisë, e njëjta gjë nuk mund të thuhet për Moldavinë pritëse. Situata atje është katastrofike, me disa lojtarë që nuk i janë përgjigjur ftesës së përfaqësueses e cila u turpërua të premten duke u mundur 1- 0 nga Andorra në fushën e kësaj të fundit. Trajneri Semion Altman pranoi se ekipi nuk po kalonte një moment të mirë dhe se duhej reaguar, edhe pse kishte pasur pak kohë dhe kushtet e përshtatshme që të përgatitej për Shqipërinë. "Padyshim që ka pasur mërzi të madhe nga të gjithë pas humbjes. Por duhet ta kuptoni që futbolli nuk është shah, ku mjeshtri i madh duke luajtur me amatorin fiton gjithmonë. Futbolli është interesant se edhe cilësi të tjera janë të rëndësishme. Duke parë ndeshjen, duhet të fajësojmë veten, unë i pari. Dominuam në çdo aspekt përveç dëshirës dhe përkushtimit, aty Andorra u tregua më kërkuese dhe fitoi ndeshjen", shpjegoi Altman duke justifikuar disi humbjen përballë skuadrës së vogël. "Nesër ( sot) luajmë ndaj një skuadre më serioze, e cila është më e fortë se Andorra. Të shohim si e kalojmë këtë test, por nuk e fsheh dot që jemi në moment të vështirë. Nuk ka kundërshtarë të lehtë. Ai rezultat ishte i rëndë për mua dhe lojtarët, nuk është rastësi që jemi pa gjumë pjesa më e madhe deri në 5 të mëngjesit. Unë e kalova natën pa gjumë, të nesërmen e kisha të vështirë edhe të lëvizja. Por duhet të bëhemi gati për duelin e radhës, Shqipëria ka lojtarë që luajnë në Gjermani apo Itali, vetëm 2 të grumbulluar nga kampionati i saj. Do të bëjmë rotacion lojtarësh nga dëmtimet dhe pezullimet, jemi të detyruar. Por do të kërkojmë të bëjmë maksimumin në fushë", shpjegoi në konferencën e djeshme për shtyp trajneri i Moldavisë për duelin kundër kuqezinjve