Alarm fals për bombë në makinën e gjyqtarit, telefonata erdhi nga burgu i Drenovës
Kush është gjyqtari që liroi të dënuarin me burg përjetë, Gert Gjinarari Reagon Markelian Kuqo: Telefonata, nga grushti kriminal i atdheut tim. S'kam nevojë për mbrojtje nga shteti
Një telefonatë e rreme për vendosjen e një bombe në makinën e një gjyqtari në Korçë ka alarmuar dje policinë. Mësohet se ka qenë gjyqtari Markelian Kuqo, që ka marrë një telefonatë anonime se në automjetin e tij ishte vendosur bombë. Menjëherë policia dhe forcat e FNSH- së kanë shkuar në vendngjarje dhe kanë rrethuar zonën, ndërsa janë bërë gati për të bërë shpërthimin e kontrolluar. Madje blutë kanë fikur telefonat për çështje sigurie. Por, pas kontrollit të njësisë antieksploziv, rezultoi të mos kishte sasi lënde plasëse dhe se alarmi ishte fals. Burime zyrtare nga policia e qytetit juglindor ka bërë me dije se pas verifikimeve të bëra, ka rezultuar se telefonata është bërë nga burgu i Drenovës, ndërsa thuhet se bëhet fjalë për një person me probleme të shëndetit mendor. Nga ana tjetër, burime nga ky institucion i vuajtjes së dënimit bënë me dije se bëhet fjalë për një person ndaj të cilit është vendosur masa "mjekim i detyruar". Ndërkaq, mësohet se makina ishte e parkuar në garazhin e gjykatës së Korçës dhe se gjyqtari.
Markelian Kuqo ndodhej në gjykatë, një ditë e zakonshme pune për të. Pasi ka dalë nga ambientet e gjykatës, në përgjigje të interesit të medias, nuk la pas ironinë kur u pyet se nga erdhi telefonata: "Erdhi nga grushti kriminel i atdheut tim", tha ai. Mes të tjerash, ai ka deklaruar se nuk ka nevojë për mbrojtjen e shtetit. "Jam i qetë. Nuk kam dijeni çfarë ka ndodhur. Telefonata ka ardhur nga grushti kriminal i atdheut tim. Nuk kam nevojë për mbrojtje nga shteti", është shprehur gjyqtari Kuqo.
KUSH ËSHTË MARKELIAN KUQO
Gjyqtari Markelian Kuqo është një emër i njohur për mediat dhe opinionin publik për shkak të vendimeve të tij të diskutuara.
Më 14 shkurt të këtij viti, gjyqtari Markelian Kuqo u bë fokus i mediave pas vendimit që dha duke pranuar kërkesën dhe lirimin me kusht të një të dënuari me burgim të përjetshëm për vrasje.
Gert Gjinarari, njeriu që ekzekutoi të "fortin" e Tiranës Naim Zyberi, i dënuar me burgim të përjetshëm nga një gjykatë italiane në vitin 1997, fitoi nga gjykata e Korçës lirinë me kusht. Pas ekstradimit nga Italia, gjykata e Tiranës la në fuqi vendimin me burgim të përjetshëm të gjykatës së vendit fqinj. Por gjyqtari i çështjes Markelian Kuqo ka vendosur të pranojë kërkesën e Gjinararit për liri me kusht, vendim i marrë në 14 shkurt, gjatë një seance që zgjati pas orarit zyrtar, duke urdhëruar lirimin e menjëhershëm të tij nga IEVP Drenovë.
Gjyqtari Kuqo e arsyetoi pranimin e kërkesës për liri me kusht, duke zbatuar ligjin e kohës kur është transferuar Gjinarari në Shqipëri, sipas të cilit kjo kategori të dënuarish përfitojnë liri me kusht, pasi kanë vuajtur jo më pak se 25 vite burg dhe për arsye të jashtëzakonshme. Ndërkohë, që me ligjin e ri të ndryshuar në vitin 2017, koha për të përfituar liri me kusht është bërë 35 vite.
Në vendimin e gjykatës që disponohet gjykata argumenton se Gjinarari plotëson kriteret për të përfituar liri me kusht, pasi konsiderohet i rehabilituar në raport me veprat penale për të cilat është shpallur fajtor, ka normalizuar marrëdhëniet me trashëgimtaret e viktimës si dhe për sjellje shembullore në burg.
Kërkesa e Gjinararit për liri me kusht është kundërshtuar nga prokuroria, e cila pritet të apelojë vendimin e gjykatës së shkallës së parë. Edhe pse gjykata urdhëroi lirimin e menjëhershëm të Gjinararit, Prokuroria e Korçës ka refuzuar ekzekutimin e urdhrit, duke e lënë ende pas hekurave 45- vjeçarin. Burime konfidenciale i thanë se prokuroria ka konstatuar pasaktësi në vendimin e gjykatës, të tilla që e bëjnë të pamundur nxjerrjen e urdhrit të ekzekutimit dhe lirimin e Gjinararit.