Mbante armë në shtëpi, arrestohet xhaxhai i vëllezërve Kusi, që vranë teknikun e kondicionerit
Ja lidhja e të arrestuarit me bandën e Astrit Avdylajt
TIRANË - Policia e kryeqytetit ka vënë në pranga xhaxhain e vëllezërve Griseldo dhe Albano Kusi, të cilët janë ende në arrati, pasi akuzohen për vrasjen e 26- vjeçarit Indrit Çelaj. Mësohet se në pranga ka përfunduar shtetasi Lulzim Kusi, pasi gjatë kontrolleve të ushtruara në shtëpinë e këtij të fundit u gjet 1 armë zjarri e dyshuar kallashnikov, 4 krehëra me fishekë, dylbi dhe 17 fishekë. Bëhet fjalë për banesën e lokalizuar në fshatin Allgjatë në majë të një kodre, e mbuluar nga pemë të larta, ku dyshimet janë se aty u fshehën pas vrasjes për disa ditë Gilberto dhe Albano Kusit, për t'u arratisur më pas drejt Greqisë. Lulzim Kusi nuk është një emër i panjohur në botën e krimit. Ai është vëllai i Durim Kusit, vrasësit me pagesë të kushëririt të Astrit Avdylit, Dritan Avdylit, nga ku u pasuan më pas me një sërë vrasjesh për hakmarrje. Bëhet fjalë për një ngjarje të vitit 1996. Dritan Avdyli i kishte vënë një gjobë të majme pronarit të fabrikave të tullës, Tefik Hyseni. Ky i fundit e thirri me justifikimin se do i jepte lekët, më pas me të mbërritur në vendin e takimit, Durim Kusi e qëlloi me breshëri arme. Hakmarrja erdhi shpejt, pasi vëllai i Astritit, Shkëlqimi vrau në Tiranë, Durim Kusin. Sipas "Shqiptarja. com", arma e gjetur në shtëpinë e Kusit, nuk është arma e krimit që nipërit e tij përdorën për vrasjen e Çelajt, pasi nga hetimet dhe dëshmitë e punonjësve të tjerë, ka rezultuar se 26- vjeçari është vrarë me "pistoletë" dhe jo "kallashnikov". Indrit Çelaj u qëllua më 23 gusht me plumb në kokë teksa ishte duke kryer punime në tualetin e katit të parë për montimin e kondicionerit. Dëshmitë e dy punonjësve të tjerë i treguan prokurorisë së Griseldo Kusi i kërkoi llogari Çelajt për një vrimë që po hapte në mur, e më pas e qëllon me pistoletë. Vrasja e Çelajt nga Griseldo Kusi u përforcua edhe më shumë nga dëshmia e Lorenc Veliaj. Ky i fundit i tha policisë se Griseldo i kishte kërkuar të merrte përsipër krimin, pasi ishte edhe në kërkim policor.