U arrestua për shpërdorim detyre, Gjykata e Apelit liron kreun e Kadastrës, Liridon Pulën
DURRËS
- Lirohet me masën detyrim paraqitje kreu i Kadastrës në Durrës, Liridon Pula. Vendimi për lirimin e tij u mor dje nga Gjykata e Apelit në Durrës. Liridon Pula u arrestua pak ditë më parë, ku nga ana e Krimit Ekonomik, nën dyshimet se së bashku edhe me zyrtarë të tjerë, kanë tjetërsuar dhe abuzuar me pronat, kryesisht në bregdet. Arrestimi i kreut të Kadastrës në Durrës solli një përplasje mes qeverisë dhe prokurorit të Durrësit, Arjan Ndoja, i cili firmosi për arrestimin e tij. Në fillim të muajit, prokuroria arrestoi Lusiena Kolën, përgjegjëse e sektorit juridik në ASHK- në e Durrësit. Më pas njoftoi edhe arrestimin e Liridon Pulës, i cili mbante postin e drejtorit. Prokuroria ka bërë po ashtu shpalljen në kërkim të ish- kreut të Agjencisë së Legalizimeve. Prokurori Ndoja u akuzua nga kryeministri Rama dhe zv. kryeministri Erion Braçe se mbështet bandat e krimit dhe se ka ushtruar presion ndaj kreut të kadastrës në Durrës. Zv. kryeministri Erion Braçe ndoqi seancën e parë gjyqësore në Durrës, ku Pula u la në masë arresti me burg. Braçe tha se është presion kriminal mbi drejtuesin e Kadastrës në Durrës, për shkak se Pula nuk ka pranuar të legalizojë pallate monstrueze, siç i quajti zv. kryeministri, pavarësisht se ka qenë nën presionin e banditëve, që grabisin prona në zonën bregdetare të Durrësit dhe mbështeten nga prokurorë dhe gjyqtarë. Prokurori Arjan Ndoja është akuzuar edhe nga kryeministri Edi Rama se vepron në shërbim të grupeve kriminale dhe u bën presion zyrtarëve, duke paralajmëruar një ligj special kundër prokurorëve dhe gjyqtarëve të korruptuar, por që janë ende në sistemin e drejtësisë. Rama e cilësoi këtë kategori në sistemin e drejtësisë si ‘ KÇK’, prokurorët dhe gjyqtarët që sipas tij e dinë se nuk dinë se nuk do ta kalojnë vetingun dhe po ecin me parimin ( kap çfarë të kapësh) deri kur të shkarkohemi. Në një vendim të 10 tetorit, Gjykata e Apelit rrëzoi sërish prokurorin Arjan Ndoja për akuza të pabazuara në prova duke liruar edhe zv. drejtoreshën e Agjencisë Shtetërore të Kadastrës në Durrës Lusiena Kola, pas ankimimit të avokatit të saj mbrojtës, Gramoz Lika.