Rrëmbehet 31- vjeçari nën kërcënimin e armës, kapet një prej pengmarrësve, tre në kërkim
BURREL - Një 31- vjeçar është marrë peng në Burrel nën kërcënimin e armës. Burime zyrtare nga Policia e Shtetit bënë me dije se një prej autorëve është vënë në pranga, ndërsa 3 të tjerë janë shpallur në kërkim. Gjatë operacionit policia sekuestroi një kallashnikov, municion luftarak dhe automjetin, me të cilin u mor peng 31- vjeçari. "Më datë 17.10.2019, rreth orës 03: 40, Policia e komisariatit Mat ka marrë informacion se në lagjen ' Pjetër Budi', në Burrel, po ndodhte një konflikt mes disa personave. Menjëherë shërbimet e policisë kanë nisur hetimet për verifikimin e rastit dhe rezultoi se shtetasi S. L., në bashkëpunim me shtetasit L. I., M. B., S. L. dhe I. K., për shkak të një konflikti të hershëm dyshohet se nën kërcënimin e armës ka marrë me forcë në automjet shtetasin A. H., 31 vjeç dhe më pas e ka dërguar në banesën e shtetasit I. K., në fshatin Batër e Madhe, Burrel", njoftoi ndër të tjera policia. Ndërsa sqaroi se falë reagimit të menjëhershëm dhe hetimeve të kryera nga ekspertët e policisë është bërë i mundur arrestimi i shtetasit S. L., 32 vjeç, banues në Burrel. Po të njëjtat burime thanë se janë shpallur në kërkim dhe po punohet për kapjen e shtetasve: S. L., 31 vjeç, L. I., 34 vjeç, M. B., 24 vjeç, të gjithë banues në Burrel. Ndërsa është proceduar penalisht në gjendje të lirë shtetasi I. K.. Gjatë kontrollit në vendin e ngjarjes është gjetur dhe sekuestruar nga policia arma e zjarrit tip kallashnikov model 56, me 15 fishekë dhe automjeti tip ' Mercedes Benz', i përdorur nga këta shtetas. Materialet hetimore do t'i referohen Prokurorisë Mat për hetime të mëtejshme për veprat penale ' Heqja e paligjshme e lirisë', e kryer në bashkëpunim dhe ' Mbajtja pa leje e armëve dhe municioneve luftarake".